Внукот на кралицата Елизабета ја отворил душата на двајца измамници кои се претставиле како Грета Тунберг и нејзиниот татко Сванте.

Британскиот принц Хари неочекувано ја отворил душата на руските комичари кои му се јавиле на телефон, претставувајќи се како шведската активистка за борбата против климатските промени Грета Тунберг и нејзиниот татко Сванте.

Хари кој со сопругата Меган и синот Арчи одлучи да го напушти кралското семејство и да започне живот во Канада, отворело зборувал за “Мегзит” и за тоа дека американскиот претседател Доналд Трамп има крвави раце.

Заштита на синот

Британскиот принц во разговор со комичарите Алексеј Стољаров и Владимир Кузњецов, кои се познати како Вован и Лексус, инстистирал на тоа да се повлече од кралското семејство за да го заштити синот.

“Потполно се одвоивме од повеќето членови на семејството. Нашиот нов живот во Канада е многу подобар. Знам дека на Меган не ѝ беше лесно да се венча за принц”, рекол Хари.

Помладиот син на британскиот принц, престолонаследникот Чарлс, никогаш претходно не се состанал со Грета. Руските комичари го измамиле во два наврати преку повици кои се случиле на 31-ви декември и 22-ри јануари.

Уништени животи

Тој во еден од разговорите ги нападнал светските лидери поради тоа што не преземаат доволно мерки во борбата против климатските промени.

“Светот стана проблематично место. За жал, го водат многу болни луѓе поради што ти и помладите генерации морате да направите разлика. Вие морате да шокирате и да ги разбудите луѓето. На крајот од денот, сите ние сме жаби ставени во ладна вода која дошла до точка на вриење, а не сме свесни за тоа”.

“Факт е дека Доналд Трамп премногу ја форсира индустријата за јаглен во Америка, тој има крвави раце. Тоа влијание на островските земји е далеку од јавноста, но ние бевме таму и видовме дека животите на тие луѓе потполно се уништени. Секој месец умираат голем број луѓе поради некои природни катастрофи предизвикани од човечки фактор”, навел тој.

Поединечни светски медиуми се сомневаат дека Хари го изјавил сето тоа и дека снимката која се појави во јавноста е вистинска. Британскиот принц сè уште не се огласил по повод ваквата ситуација.

Брак помеѓу Грета и принцот Џорџ

Комичарите отишле толку далеку што го навеле Хари и на разговор за брак помеѓу 17-годишната Грета и 6-годишниот принц Џорџ. Тие му кажале дека Грета е далечен потомок на кралското шведско семејство.

“Борбата против климатските промени би била полесна доколку се договори брак помеѓу нашите две династии. Принцот Џорџ би бил вистинска прилика. Дали се согласуваш?”, го прашале тие.

“Да, сигурно можам да помогнам во тоа”, рекол Хари.

Хари за…

Принцот Ендрју и односот со Епстајн

“Што и да правел тој, тоа не е поврзано со мене и мојата сопруга. Ние сме потполно одвоени од поголемиот дел од моето семејство”.

Животот во Канада

“Животот таму е многу подобар отколку во кралското семејство. 10 години бев војник и сум понормален отколку што смета моето семејство”.

Борис Џонсон

“Мислам дека тој е добар човек и ти си една од неколкуте личности кои можат да допрат до неговото срце”.