Tри лица, меѓу кои и една жена, биле уапсени за време на протест на сопствениците на барови, ресторани и продавници во Валона против затворањето на објектите во 22 часот, против полицискиот час и другите мерки воведени во Албанија за да се спречи ширењето на коронавирусот.
Учесниците на протестот, организиран на шеталиштето во Валона, ја испеаја химната и одбија да ги затворат своите продавници, пренесуваат албанските медиуми.
Албанскиот премиер Еди Рама изјави по повод протестот на угостителите во Валона дека секој што сака да игра и пее ноќе може да се организира во природа и на други места каде што никому нема да му пречи.
„Протести поради музика? Таму нема музика, туку страшно акустично загадување, каде што се обединуваат десетици звуци. Правата на оние што сакаат музика во текот на целата ноќ не може да надвладеат над правата на оние што сакаат да уживаат во звукот на морето навечер“, рече Рама.
