Роберт Кит Хори, роден на 25-ти Август 1970 година во Харфорд Каунти (Мериленд). Своите спортски почетоци ги прави во средното училиште Андалузија (Алабама) каде е избран за најдобар средношколец во државата. Со своите 208 цм. имаше висина да се спротивстави на центрите а со својата брзина, агилност и вештина да биде поуспешен од речиси сите на теренот.
По сјајната игра добива целосна стипендија од универзитетот Алабама. Таму формира страшно атрактивен тандем со (уште една идна NBA ѕвезда) Латрел Спривел. Во колеџ, Хори поминува 4 години по кој беше повеќе од јасно дека е подготвен за професионално ниво. Во 1992 година, на драфтот е избран како 11 пик од страна на Хјустон Рокетс.
Хјустон Рокетс (1992-1996)
Уште во своите први денови како професионалец, Хори беше член на стартната петорка, завземајќи ја крилната позиција. Имаше солидна минутажа кој ја искористи на најдобар можен начин.
Стана миленик на публиката и беше една од најважните алки во тимот. И покрај тоа што беше млад, неговата игра покажуваше зрелост и ладнокрвност (посебно кога се решаваше натпреварот).
Во четирите години за кој настапуваше во Хјустон, “ракетите” два пати станаа светски шампиони (1994 и 1995 година). Го добива прекарот “Big shoot Rob” поради важните поени кога се “крши” резултатот.
Откако “рокетси” го губат приматот на шампиони, управата решава да направи одредени промени. Кога се отвори шансата во Хјустон да пристигне (еден од најдобрите играчи во NBA) Чарлс Баркли, “ракетите” спремија голем пакет кој го испратија во спротивен правец. На 19-ти Август 1996 година, Роберт Хори е “трејдуван” во Феникс.
Феникс Санс (1996-1997)
Роберт Хори отворено го искажуваше своето незадоволство што го напушти Хјустон. На “сонцата” им стана јасно дека ќе имаат многу проблеми со својот новоангажиран адут кој јавно изјавуваше дека не гледа иднина во тимот од Аризона. Феникс ја стартуваше сезоната со ужасни 0-13.
Во новиот дрес, Хори настапи на 32 натпревари. Несогласувањата со тренерот Дени Ејнџ беа очигледни од самиот старт. Ситуацијата ескалираше кога на среде натпревар крилото фрли пешкир во лицето на својот тренер. За повеќето упатени во случајот, ова беше добро осмислен потег на крилото. Инсистираше да биде разменет а неговата желба беше исполнета кога на 10-ти Јануари 1997 година беше испратен во Лос Анџелес Лејкерс а во спротивен правец се врати староседелецот, Седрик Себалос.
10 години подоцна, Хори ќе додаде уште една дополнителна причина на навивачите од Аризона да го презираат. Токму тој ја имаше главната улога во хаосот кој настана во серијата помеѓу Феникс и Сан Антонио (во 2007 година). На “сонцата” им беа суспендирани повеќе играчи што директно делуваше на крајниот исход. “Санси” беа елиминирани а “Спарси” таа година ја освоија шампионската титула.
Лос Анџелес Лејкерс (1997-2003)
По пристигнувањето во “градот на ангелите”, Хори играше како препороден. Менувањето на средината го мотивира а резултатите веднаш беа видливи. Во тим предводен од Шекил О’Нил и Коби Брајант, тој перфектно се вклопи и даваше полн придонес.
Во дресот на “лејкерси” помина 6 и пол години, исполнети со безброј возбудливи моменти и решавачки шутеви. Според многумина претставува еден од најдобрите “споредни играчи” во историјата. Освои уште три шампионски титули (2000, 2001 и 2002 година). По крајот на сезоната 2002/2003 неговиот договор истече а Хори се реши да потпише за актуелниот шампион. На 24-ти Јули 2003 година, стана нов играч на Сан Антонио Спарс.
Сан Антонио Спарс (2003-2008)
Хори како прекален ветеран пристигна во Тексас. Неговата улога (и минутажа) беше намалена но, тоа воопшто не го направи помалку вреден за тимот. Оние кој со внимание ја следеа неговата игра сметаа дека “Биг Шот” и нема потреба да настапува во регуларниот дел од сезоната туку (како и безброј пати претходно) за време на “плеј оф” натпреварите е вистинско богатство да го имате во ростерот.
Во тимот од Тексас поминува пет незаборавни години. Уште два пати се закити со шампионскиот прстен (2005 и 2007 година). Во Август 2008 година, по 16 одиграни сезони и на свои 37 години, става крај на професионалната кариера.
РЕЗИМЕ
Роберт Хори е сметан е за еден од најубиствените шутери во историјата како и еден од оние кој никогаш не потпаѓа под притисок. Претставува вистински рариртет и е (можеби) најкорисниот играч кој никогаш не настапи на “All-Star” натпревар.
Никогаш не беше прва опција во тимот но, најчесто беше единствената и најисправна опција кога натпреварите се решаваа. Одличен соиграч. Цврст, исклучително корисен, дисциплиниран а пред се ладнокрвен. Освои 7 шампионски титули.
Денес е кошаркарски аналитичар, коментатор во “Спектрум Спортс Нет” (за “лејкерси”) како и организатор на кошаркарски кампови во Лос Анџелес, каде живее со својата сопруга и четирите деца.
Роберт Хори, човекот кој не знаеше за притисок.
NBA FAN
Димитар Младеновски
