Климатските промени предизвикале преселба на белите мечки од поларниот круг во населените места на Архангелската област во Русија. Тие веќе му прават проблеми на локалното население, па дури и Министерството за одбрана на Русија е вклучено во операцијата за нивно враќање во првобитното живеалиште.
Архипелагот Нова Земја во Архангелската област оваа година бил посетен од “бројна делегација” на бели мечки од дури 52 члена. Жителите на поларниот круг не е прв пат да видат како група мечки се шетаат по улиците, дури влегуваат во згради, но ова е прв пат така голем број од нив да се спуштат во населено место. Тие толку се опуштиле што воопшто не обраќаат внимание на светлечките ракети, патролните возила и кучиња, со кои се обидуваат да ги избркаат. Се однесуваат како вистински господари на Архипелагот.
Главниот уредник на рускиот портал “EcoLife”, Александар Самсонов, смета дека престојот на дивите животни во човековата средина не е никаков феномен. Луѓето прилично се “размазиле” и заборавиле дека тие секогаш живееле покрај нив, “само што во еден момент до толку ги уништиле, што опасноста исчезнала”.
Меѓутоа, климатските промени имале позитивен ефект на нивното размножување и денес во Русија ги има повеќе од 3.000.
“Тоа што настанале поволни услови за таа популација е добар знак. Треба да научиме да управуваме со тие процеси. Конечно се зголемува бројноста на дивите животни, не само на белите мечки, туку и на тигрите”, објаснува Самсонов.
Многу експерти се обидуваат да откријат што ги натерало белите мечки да се спуштат во јужните краишта. Одговорот изгледа е прилично едноставен – глад. Имајќи во предвид дека мечките се хранат со риба која ја ловат под мразот, благата зима им ја “преместила земјата под нозе”. Мразот се топи, што ги тера дека повлекуваат во населени места и да копаат по депонии.
“Кога мечките почнуваат да се појавуваат, секогаш ќе се најдат луѓе кои ќе ги хранат поради фотографирање. Мечките брзо се навикнуваат на прехранување. Мечката трча по луѓе, не за да ги нападне или изеде, туку во надеж дека од нив ќе добие нешто за јадење”, објаснува координаторот на проектот за зачувување на биодиверзитетот на Арктикот, Михаил Стишов, кој ја негира теоријата за агресивност на белите мечки.
Веќе една недела трае вонредната ситуација во Нова Земја. Еколозите веќе излегле на лице место, а на помош било повикано и Министерството за одбрана на Русија, под чиј специјален надзор се наоѓа цела таа област. Сите бараат начини да ги избркаат мечките на север.
“Не е реално 50 мечки некаде да се транспортираат. Нема да помогне ако мечките се протераат 20-30 километри, тие ќе се вратат побрзо од оние кои ги одвеле таму. Треба да се однесат со хеликоптери некаде на мраз, на другата страна на Нова Земја, а тоа е многу скапо”, рекол Сташин.
Едно од решенијата е мечките да се успијат, а потоа да се пренесат во други места. Со оглед на тоа дека некои се тешки и до 800 килограми, тоа ќе бара широка и многу сложена операција.
Во исто време, во Приморскиот крај, на другата страна на Русија, амурските тигри, друг заштитен вид, исто така почнале активно да се мешаат меѓу луѓе. Често може да се видат во близина на населби, но засега нема опасност по населението. Како што наведуваат експертите, засега има доволно животни за нивна прехрана.
