Професорот на Факултетот за светска економија и меѓународни односи на Московскиот Универзитет, Федор Лукјанов, смета дека значењето на Западот на се помулутиполарниот свет опаѓа и дека Европа во новиот светски поредок мора уште да работи за да го најде своето место.
Лукјанов, во дискусијата во Виена, рекол дека пред три децении изгледало дека либералната демократија и пазарната економија по распадот на источниот блок и СССР ќе се наметнат и етаблираат како единствен систем кон кој се тежнее.
“Од биполарен, светот од 1989-та година во краток временски рок стана униполарен, со САД и НАТО на врвот. Сојузот со сила која во воен и економски поглед во тој облик уште не постоела. Комунизмот исчезна, западниот систем се наоѓаше пред глобален препород и се предвидувал “крај на историјата”. Поради тоа искуство многу Руси доживеале траума, бидејќи нивната земја во најкраток можен временски период од суперсила била деградирана на регионална сила, како што кажа подоцна еден американски претседател. Ниедна држава во светот никогаш во историјата не била толку брзо трансформирана”, објаснил Лукјанов на собирот во организација на Институтот за безбедносна политика на Воената академија во Виена.
Тој рекол дека Европа моментално минува низ ново време, бидејќи САД се повеќе се повлекува како заштитна сила.
За американскиот претседател Доналд Трамп, војската не е во прв план, туку економијата, поради што во фокусот му се трговските војни против Кина, објаснил Лукјанов.
“Со интервенцијата на Русија во сирискиот конфликт во септември, Москва повторно воено се појави на меѓународниот паркет, што предизвика збунетост кај САД и нивните сојузници. Се прекина со хегемонијата, и поранешната суперсила повторно го зазема своето место на светската сцена”, нагласил Лукјанов.
Покрај тоа, како што додава, САД под Трамп повеќе не сака да биде глобален лидер, и во нивната сенка моментално се етаблираат Кина, Индија и Русија како играчи во новиот светски поредок.
Кина, како што истакнува Лукјанов, до средината на овој век планира да биде, не само економска сила број еден, туку и прва воена сила.
Рускиот експерт нагласува дека Европа, ако не сака постепено да губи на значење, треба да создава нови сојузи.
“Русија со своите рудни богатства и Кина со човечката сила даваат огромна можност на стариот свет на патот кон нов поредок. И безбедносно политички, во време на бројни конфликти, Москва може да биде гарант за стабилност”, рекол Лукјанов.
