Италијанскиот министер за внатрешни работи и лидер на десничарската партија Лига, Матео Салвини изјави дека сака да ја формира најголемата група во Европскиот парламент која би можела да ги „промени правилата на Европа“.
Салвини го изјави тоа после состанокот со лидерите на германската десничарска партија Алтернатива за Германија, Данската народна партија и финската партија Вистински Финци во Милано.
Салвини исто така истакна дека новата група на десничари сака да ја има одлучувачката улога во изборот на членовите на идната Европска комисија која ќе биде формирана после изборите за Европскиот парламент.
„Нашата цел е да бидеме водечката сила и силата на промените“, порача италијанскиот министер истакнат по своите анти-мигрантски ставови.
Според неговите зборови, четирите партии ќе работат заедно со своите пријатели како што е француската десничарска партија Национален фронт на Марин Лепен, иако таа не беше присутна на состанокот. Салвини откри дека некои од темите на состанокот биле контролата на границите и борбата против тероризмот и екстремизмот.
„Амбициозната цел на сите нас на оваа маса е да подариме живот на една нова група во Европскиот парламент. Групата би била најголема, најзначајна, најодредена и најопределена за иднината во идниот Европски парламент“, изјави Салвини.
Иако партиите имаат различни ставови, тие ќе се обидат да ја променат „ноќната мора на моменталните приоритети на Европската унија“, истакна италијанскиот министер и нагласи дека во центарот мора да се вратат работата, семејството, безбедноста и одбраната на животната средина.
Еден од лидерите на германска Алтернатива за Германија, Јорг Мотен порача дека групата е наречена Европска алијанса на народите и веќе има започнато со работа.
„Останува да видиме кој ќе се приклучи на новата алијанса. Тоа што не обединува е поголемо од работите кои што не разделуваат“, порача Андерс Вистисен од Данската народна партија.
