Претседателот на венецуелскиот парламент Хуан Гваидо навел за “New York Times” дека поддршката од војската на Венецуела е “круцијална” за соборување на претседателот Мадуро од власт.
Гваидо, кој неодамна самиот се прогласил за претседател на државата, напишал во колумна дека имал тајни состаноци со припадници на војската и полицијата, како и дека повеќето соговорници биле согласни дека ваквата ситуација во Венецуела не може да се одржи.
“Крајот на поддршката од војската за Мадуро е круцијален за овозможување на промена на владата, и повеќето луѓе во униформа се согласуваат дека моменталните маки во земјата се неподносиливи. За транзиција ќе биде потребна поддршка од главните воени единици. Имав тајни разговори со припадници на војската и полицијата”, навел тој.
Самопрогласениот лидер повторил и дека вториот претседателски мандат на Мадуро е нелигитимен.
Гваидо веќе го поддржале САД и повеќе други земји, а портпаролката на Белата куќа, Сара Хакаби Сандерс, на Твитер навела дека “САД се со народот на Венецуела”.
Вчера илјадници приврзаници на опозицијата во Каракас ја повикале војската да го напушти Мадуро.
Мадуро го обвинил Гваидо дека е “марионета во рацете на грингосите”.
