Директорот на Регулаторна комисија за енергетика, Марко Бислимоски во вчерашното гостување во Тема на денот на „Сител“, зборуваше за инцидентот кој му се случи пред два дена и истакна дека бил изненаден затоа што никогаш претходно не добивал закани.
„Искрено и за мене беше големо изненадување. Претходно, не сум чувствувал притисоци и закани. Вообичаено кога ги носиме одлуките, дел од одлуките завршуваат на суд и ние таму ги решаваме работите. Ова е пристап онака како што некој решил да го прави и тоа е тоа“, вели Бислимоски.
Тој додава и дека не се плаши воопшто и дека ќе продолжи со работата како и досега.
„Сакам да истакнам дека не се плашам, дека ќе продолжам да работам како и досега и она што ми е многу важно сакам да им се заблагодарам не само на пријателите што ми се јавуваат туку на обични луѓе коишто ме сретнаа овие два дена и ми дадоа поддршка да продолжам да работам како и досега. И тоа е единствениот пат“, кажа Бислимоски.
Изјави дека ги презеле сите мерки за заштита на електроенергетскиот систем. Како што рече тој, постапката за одземање на лиценцата на „У Повер“ е почната откако е добиен допис од МЕПСО за злоупотреба на балансираната енергија за комерцијални цели.
„Преземавме мерки за да го заштитиме електроенергетскиот систем. Кон таков чекор се одлучивме откако МЕПСО ни испрати допис и алармираше за „У Повер“. Во август и половина на септември биле користени овие резерви за комерцијални потреби. Инцидентот нема да ме поколеба“, истакна Бислимоски на Сител.
Бислимоски вели дека немал никакви претходни закани од компанијата „У Повер“.
„Никакви претходни закани не сум имал од таа компанија. Таа компанија коректно си работеше на пазарот. Во одреден период го зголемуваше своето портфолио на потрошувачи и тоа е тоа. Значи, такви закани досега не сум имал“, додава Бислимоски.
Вели дека досега закани кон него најчесто биле упатувани преку Фејсбук, но не им обрнувал внимание.
„Закани имаше по носењето на одлуката за намалување на цената на парното, добив закана „куршум за тебе“. Пријавена е таа, по фејсбук беше тоа и од прилика тоа било тоа. Немало некои закани, а и не сум ни обрнувал внимание и понатаму уште помалку ќе им обрнувам внимание“, рече Бислимоски.
