Ив Рауш, осомничен за разоружување на четворица полицајци во Германија, познат по прекарот Рамбо, раскажал дека ништо не јадел додека се криел во Шварцвалд, а времето во главно го минувал во дупки, соопштиле денес властите.
Рауш, кој побегнал минатата недела, а бил уапсен по пет дена потрага, наведува и дека телефонот во главно му бил исклучен за безбедносните сили да не можат да го лоцираат.
Тој побегнал во шума во близина на градот Опенау на југозападот на Германија, откако им се заканил на четворица полицајци и им ги одземал пиштолите.
Во потрагата по него учествувале елитна единица, хеликоптери и кучиња трагачи, а користени биле и термички детектори.
Повеќе од 2.430 полицајци учествувале во операцијата, наведува полицијата.
Осомничениот бил пронајден како се крие во грмушки, а пред него имало четири пиштоли, додека во скутот имал секира, изјавил заменик шефот на регионалната полиција.
Како што навел, Рауш бил полесно повреден во операцијата, како и еден полицаец кој се здобил со повреди од секирата.
Рауш, откако бил уапсен во петокот, рекол дека набрзина спакувал четири пиштоли и други основни работи и побегнал во шумата.
Тој рекол дека го забележал полицискиот хеликоптер и дека претпоставил дека во тек е потрага по него. Се движел навечер, а преку ден се криел во дупки.
Полицијата и обвинителството додаваат дека бил пронајден документ, кој изгледа како писмо, кое Рауш го напишал за членовите на неговото семејство во случај нешто да му се случи.
Полицијата првобитно била повикана поради сомнителен маж кој, како што е наведено, шета околу колибите во шума во близина на Опенау.
Полицајците го пронашле Рауш во колиба и рекле дека најпрво изгледал како да сака да соработува, но одненадеж извлекол пиштол и разоружил четворица полицајци.
Медиумите го нарекле Рамбо по ликот од американските филмови, воен ветеран од Виетнам, кој бега од американската полиција.
