Иако Европската агенција за лекови го одобри користењето на вакцината на “AstraZeneca” кај сите полнолетни лица, бројот на земји членки на Европската унија кои се сомневаат во ефикасноста на вакцината кај постарите лица расте.
Германија беше првата земја која и пред препораката на Европската агенција за лекови, одлучи да не ја користи вакцината кај лицата постари од 65 години. Вчера истата одлука ја донесоа и Белгија, Шведска, Франција и Полска. Белгија отиде и чекор понатаму и препорача користење само кај лица помлади од 55 години.
Белгиската влада вчера ја прифати препораката на Врховниот здравствен совет кој заклучи дека вакцината против коронавирус на “AstraZeneca” е „многу ефикасна за граѓаните на возраст од 18 до 55 години“.
Властите на споменатите земји не велат дека вакцината не е ефикасна, туку дека немаат доволно докази за тоа.
„Моментално достапните податоци за лицата над 65 години се ограничени на само мал број на тестирани и не даваат можност за сигурен заклучок колку вакцините се безбедни и делотворни за здравствените работници и лицата помлади од 65 години“, соопштија од францускиот Национален институт за здравство.
Белгискиот министер за здравство, Франк Ванденброуке појасни дека ќе се следат понатамошните резултати од истражувањата и искуствата: „Ако не сте сигурни за постарите лица, секако дека ќе го препорачате користењето на тие вакцини за лицата помлади од 55 години“.
Белгија поради ова ќе мора и да ја преиспита својата стратегија за вакцинирање, затоа што тамошните здравствени власти сметаа и на вакцината на “AstraZeneca”. Полска одлучи вакцината на “AstraZeneca” да ја користи за граѓаните на возраст од 18 до 60 години.
Инаку, министерот за здравство на Македонија, Венко Филипче вчера информираше дека Владата добила допис од „КОВАКС“ механизмот, во кој властите биле известени дека првата вакцина која ќе пристигне во земјата е токму вакцината на “AstraZeneca”.
Како што информираше министерот Филипче, испораката на 35% од предвидените 175,200 дози ќе биде реализиран во март, а останатите дозив во земјава ќе пристигнат до средината на оваа година.
