Секој трет граѓанин на земјава има антитела на коронавирусот, покажува испитувањето на Институтот за имунобиологија кое се спроведуваше во изминатите 2 недели во Скопје.
Анализата се спроведе врз 1.000 случајни минувачи на 6 локации во Скопје и тоа во Карпош, Аеродром, ТЦ „Мавровка“, во Градскиот парк и на улица Македонија и Плоштад Македонија. Притоа, се внимавало испитаниците да не се од исто семејство, односно да се земат примероци од различни групи и возрасти.
„Обработката на податоците покажа дека 31 отсто од испитаниците имаат антитела или секој трет граѓанин прележал Ковид-19. Во анализата беа земени примероци и од луѓе кои знаеле дека го прележале вирусот, но и од испитаници кои не биле заразени или пак не знаеле дека прележале“, вели директорот на Институтот за имунобиологија Александар Петличковски, пренесува „Сакам да кажам“.
Како што објаснува Петличковски, ваквите разулати укажуваат дека земјава е на половина пат кон создавање колективен имунитет, за што е потребно болеста да ја прележат најмалку 60 отсто од граѓаните.
Институтот правел испитувања и врз медицинските лица кои ја примија вакцината на „Фајзер“ за резултатите кои ги дава вакцинацијата. Петличковски вели дека податоците кои ги добиле се одлични и дека вакцинираните лица имаат голема доза антитела.
