Поранешниот шеф на воено разузнавачката служба на Јужна Кореја, денес бил пронајден мртов, соопштија од јужнокорејската полиција.
Ли Џае-Су бил под истрага на државното обвинителство поради издавање на наредба за илегално следење на семејствата на луѓето кои што загинале во несреќата со потонувањето на траектот во 2014-та година. Ли, кој инаку веќе беше пензиониран генерал со три ѕвезди, ги отфрлал тие обвинувања.
Оваа несреќа, во која што загинаа над 300 луѓе, од кои во најголемиот дел беа ученици од средно училиште, предизвика остри критики на сметка на тогашната претседателка на Јужна Кореја, Парк Геун Хје. Таа подоцна беше сменета поради корупција во март 2017-та година.
Полицијата соопшти дека телото на Ли било пронајдено во една зграда во главниот град Сеул. Новинската агенција „Јонхап“ тврди дека Ли најверојатно скокнал од зградата, а било пронајдено и проштално писмо.
Инаку, Јужна Кореја е една од земјите со најголема стапка на самоубиства кога станува збор за најразвиените држави.
