Шефот на Републиканската партија во Тексас рече дека „државите што го почитуваат законот“ би можеле да создадат „сопствена унија“, откако Врховниот суд на САД ја отфрли тексашката тужба за претседателските избори во 2020 година.
Одлуката на Врховниот суд е последниот судски пораз на Републиканската партија во обидите за поништување на изборните резултати на 3 ноември, на кои демократскиот кандидат Џо Бајден го победи претседателот Доналд Трамп, ускратувајќи му го вториот мандат, пренесува Фокс њуз.
Тексас тврди дека има право „да побара од сите други американски држави да ги следат уставно утврдените правила при назначувањето електори во електорскиот колеџ“. Тексас тврди дека и другите сојузни држави страдаат секогаш кога една држава „го крши федералниот закон за да влијае на резултатот од претседателските избори“.
Сепак, Врховниот суд ја отфрли вака втемелената тужба, пренесува Асошиејтед прес. Во образложението се наведува дека Тексас „не покажал правно препознатлив интерес за начинот на кој друга федерална држава ги спроведува своите избори“. Поранешниот конгресмен од Флорида, Ален Вест, кој од јули ја предводи Републиканската партија во Тексас, го објави својот одговор по судската пресуда.
„Одбивајќи ја тужбата на Тексас и на 17 други држави и 106 американски конгресмени, Врховниот суд пресуди дека една сојузна држава може да презема неуставни активности и да го прекрши сопствениот изборен закон, што резултира со штетни ефекти врз другите држави што го почитуваат законот, сè додека државата престапничка не ги сноси последиците“, порача Вест од Далас-Форт Ворт.
„Оваа одлука претставува преседан според кој сојузните држави можат да го кршат Уставот на САД и да не одговараат за тоа. Оваа одлука ќе има далекосежни последици за иднината на нашата уставна република“, продолжува Вест.
Предлогот на Вест е во согласност со ставовите претходно изразени од спикерот на републиканците, Кајл Бидерман од Фредериксбург, кој повикуваше на референдум на кој гласачите би требало да одлучат дали Тексас треба да се оддели од САД.
„Федералната влада е надвор од контрола и не ги претставува вредностите на Тексашани. Затоа, се обврзувам да подготвам предлог-закон што ќе им овозможи на Тексашани да гласаат за повторно воспоставување на државата Тексас како независна нација“, се вели во изјавата на Бидерман.
Освен тоа, радиоводителот Раш Лимбо оваа недела рече дека расколот во САД е неизбежен, со оглед на хроничните несогласувања меѓу конзервативците и либералите.
„Јас всушност мислам, а многумина алудираат на тоа, дека ние се движиме кон отцепување. Не иде веќе вака. Не може да има мирен соживот помеѓу две сосема различни животни теории, теоријата на владеење, теоријата за тоа како ги водиме нашите работи. Не можеме да бидеме во толку грозен судир без одредени отстапки“, додаде Лимбо.
Во меѓувреме, администрацијата на Трамп не изгледа подготвена да се откаже од борбата „измамата со гласачите“ да се признае и на суд. За време на гостувањето во политичкото ток-шоу „Ханити“ во петокот, адвокатот на Трамп Руди Џулијани рече дека правниот тим на претседателот не завршил со изборните тужби.
„Луѓето во оваа земја имаат право да бидат сослушани. Судот барем треба да им дозволи да бидат сослушани за да можат да ги презентираат своите факти, односно не смеат да бидат туркани настрана и да се скријат тие факти“, рече Џулијани.
