Глобалните бродски компании трошат милиони евра за вградување на уреди кои лажираат дека бродот е во склад со сите еколошки прописи.
Благодарение на овие уреди, издувните гасови наместо во воздух, се испуштаат во морето. На ваквата технологија биле потрошени околу 9,7 милиони евра, пренесува британски „Индепендент“.
Уредите работат на начин на кој го извлекуваат сулфурот од издувните гасови кои ги произведуваат прекуокеанските бродови, а извлечениот сулфур се испушта во морето. Освен тоа, исфрлањето на сулфурот ги зголемува и емисиите на CO2, затоа што бродот на овој процес троши повеќе гориво.
Се проценува дека досега 3,756 бродови ја вградиле оваа технологија, од кои само 23 инсталирале резервоар за сулфур и го истоваруваат на посебни места на пристаништата, наместо да го испуштаат во океаните.
За целата работа да биде уште полоша, филтрите за сулфур најчесто ги вградуваат „контејнерските“ бродови и танкерите кои заедно со крузерите се најголемите загадувачи на морето. На секој тон гориво кој што го трошат, големите бродови емитуваат околу 45 тони топли, кисели, канцерогени отпадни води кои во себе содржат и тешки метали.
Тешките метали предизвикуваат оштетувања на централниот нервен систем кај луѓето и животните, па ваквото испуштање на отпадни води во океаните не е закана само по луѓето, туку и целиот екосистем во океаните и ланецот на исхрана.
Се проценува дека половина од околу 500 најголеми крузери на светот имаат вградено вакви филтри, а можеби и најголем проблем е што ваквите бродови ги посетуваат најубавите и најзаштитени светски дестинации и природни богатства.
Поради големата опасност за околината и населението, некои пристаништа веќе носат регулатива со која на таквите бродови им се забранува пристапот. Во јануари вакви регулативи беа донесени во Белгија, Ирска, Германија, САД и Обединетите Арапски Емирати, а нешто слично се најавува и во Кина.
