Додека руската инвазија на Украина се приближува до завршувањето на првиот месец на траење, се чини дека напредувањето на нејзините трупи кон некои клучни градови, вклучувајќи ја и престолнината Киев, забавило. Каде води оваа војна? Ова се петте работи на кои треба да се обрати внимание во наредните недели, пишува “CNN”.

Русија би можела да го засили бомбардирањето

Експертите предупредуваат дека колку повеќе Русија ќе трпи пораз на земја, поголема е веројатноста дека ќе ја интензивира својата кампања со бомбардирање и употреба на друго, далекудометно оружје кое би ги довело руските војници во помала опасност. Од Украина и Русија има малку доверливи информации за бројот на загинатите, но извештајот на една руска интернет страна кој се појавил во понеделник сугерирал дека руската страна изгубила речиси 10.000 војници и дека уште 16.000 се повредени, но тие информации не се официјално потврдени.

Интернет страната “Комсомолскаја Правда” ги отстранила тие бројки подоцна во текот на денот, тврдејќи дека истите се појавиле само бидејќи сајтот бил хакиран. “CNN” наведува дека таквите загуби, ако се покажат како точни, би го објасниле бавното напредување на руските трупи и зголемувањето на бомбардирањето на клучните градови.

Иако фокусот е на Киев, Русија би можела да ги обиколи украинските борци на исток

“CNN” тврди дека Русија, во најмала рака се обидува да апсорбира делови од источна Украина. Областите како Доњецк и Луганск, кои го сочинуваат регионот Донбас, ги контролираат сепаратисти поддржани од Русија од 2014-та година, кога Русија го анектирала Крим, и додека амбициите на Русија можеби се протегаат надвор од Донбас, тоа веројатно и натаму е во центарот на вниманието, велат експертите.

„Јужниот воен округ – во Доњецк, Луганск, Мариуол, Бердањск, Мелитопол – тука се најдобрите трупи во руската војска. Дизајнирани се да се борат против НАТО“, рекол Сем Крени-Еванс, аналитичар од “Royal United Services Institute”.

Ќе има уште преговори

Едно сценарио е дека војната во Украина би можела да стане долготраен судир. “CNN” нагласува дека Русија веројатно изгубила значаен број на војници, вооружување и опрема во војната, и иако во минатото учествувала во долготрајни судири, нема да сака од овој судир да излезе со уништена војска.

„Преговорите изгледаат ветувачки, бидејќи Русија и Украина минатата недела рекле дека се движат кон реален суштински договори, наместо Русија само да поставува ултиматуми“, рекол Кеир Гилс, експерт од британскиот истражувачки центар “Chatham House” за “CNN”.

Руските службеници рекле дека нивните барања вклучуваат откажување на Украина од својата цел да се приклучи во НАТО и да се демилитаризира и да усвои неутрален статус, како што имаат Австрија и Шведска.

Масовна депортација на Украинци во Русија

Русија им порачала на жителите на Мариупол да го напуштат градот, бидејќи руските сили продолжуваат со агресивно бомбардирање, кое веќе го уништи градот. Нејзините сили отвориле хуманитарни коридори, за да им овозможат на цивилите да побегнат, но десетина илјади од нив отишле во Русија.

“RIA” јавила дека речиси 60.000 жители на Мариупол пристигнале на руска територија сосема безбедно. Руските медиуми покажале редови од возила кои очигледно одат на исток кон границата, на околу 40 километри од Мариупол. Но, советот во Мариупол ја обвинил Русија дека ги принудува жителите да одат во Русија против своја волја.

Градоначалникот на Мариупол, Вадим Бојченко, рекол дека тоа што Русите денеска го прават им е познато на постарите генерации, кои ги виделе страшните настани од Втората светска војна, кога нацистите насилно заробувале луѓе.

Уште милиони Украинци би можеле да одат

Судбината на војната е едно, а судбината на Украина е други. Веќе повеќе од 3.5 милиони Украинци ја напуштиле земјата. Повеќето се жени и деца, што значи дека семејствата се распаѓаат. Војната предизвика најголеми движење на бегалци кое Европа го видела од Втората светска војна. Тие бројки се зголемуваат со брзина од 100.000 дневно.

Ако се вклучи бројот на интерно раселени, 10 милиони Украинци досега ги напуштиле своите домови. Тоа е речиси четвртина од жителите на земјата, пренесува “CNN”.