Треба да поминат недели и месеци за сите да бидеме свесни што носи пласманот на Европско првенство за нашата сениорска репрезентација во фудбал. Од синоќа фудбалското време кај нас ќе се брои пред и после јунаците на Игор Ангеловски. Подвигот е несекојдневен и уникатен, но не е случаен и е плод на долг процес на мали или големи успеси кои беа најава на бајката од Тбилиси.
Играчка придобивка:
Македонија има генерација за иднина и за цела една деценија пред нас. Со исклучок на капитенот Пандев, простор за настапи во дресот со државниот и по Европското првенство имаат скоро сите фудбалери, а надоаѓа и новата генерација на У21 репрезентативци. Ангеловски направи тесен избор и високи стандарди за влез во репрезентација, па бројките говорат за неговиот избор. Никогаш не било потешко нов фудбалер да влезе во репрезентативен список и никогаш помалку фудбалери не играле во цел циклус, што е показател за јасни идеи, а не лутање и премногу повикувања како често во минатото.
Финансиска придобивка:
И така богатата федерација, добива „џек-пот“ со средствата од УЕФА, како награда за пласманот на завршен турнир, но и од спонзорскиот и пакетот за ТВ-права, со кои сумата ќе ги надмине и најавените десетина милиони. Со години сите наши репрезентации имаат перфектни услови, јасен план и нема простор за импровизација. Сега, тоа ниво може да се доведе до перфекција, бидејќи сите професионалци во федерацијата ја знаат и ја гледаат разликата од организациони нивоа.
Подигнување на цената на македонскиот фудбалер:
Пласманот на Европско првенство на сите наши фудбалери им ја подигна цената, денес вредат повеќе, а отвораат многу „врати“ и за идните генерации. Продефилирани се нашите ѕвезди во Италија и Шпанија, имаме асови и во Англија и Германија. се отвораат врати во Португалија и Франција. Наши фудбалери ширум Европа ќе има уште повеќе и повеќе. Исто така расте цената на нашите тренери. Бројката на оние кои работеле и тоа макотрпно во странство може да се изброи на две раце. Треба да спуштиме „капа“ пред Хаџиевски, Јонуз, Јаневски, Војневски, претходно Секуловски, Костов, Тасевски, Ѓоре Јовановски, Драган Канатларовски, Благоја Милевски, Гоце Седлоски… Да се работи во странство никогаш не е лесно, посебно ако доаѓате од, до синоќа – некоја си Македонија. Сега е поинаку – сите тие доаѓаат од земја учесник на Европско првенство. И нема да бидат повеќе само тие неколкумина, туку ќе се зголемуваат и зголемуваат.
„Декретот“ на Ѓоре Јовановски пред реализација:
Не дека другите тренери не знаат што е важно, и тоа како знаат, но само еден секојдневно потенцираше што е важно за напредок на нашиот фудбал – добри терени и инфраструктура, добри тренери и краткорочен и долгорочен план. Тоа е „декретот“ на Ѓоре Јовановски – еден од нашите најдобри тренери. Првото прашање на Јовановски секогаш беше: До каде е новиот стадион во Штип, Кавадарци, Битола, Прилеп, Чаир? Има ли помошник игралишта на број? Дури потоа доаѓаат другите работи. Тој негов „декрет“, кој требаше да е тема број еден со децении наназад – сега е пред реализација. Со последните активности на Фудбалската федерација на Македонијаи градските власти, голем дел фудбалски центри ќе добијат нови стадиони, трибини, спортски центри, помошни игралишта. Наскоро ќе имаме стадиони со рефлектори во 5-6 града во земјата, а за неколку години треба тоа да е задолжително за настап во Прва лига. Така ќе го финализираме системот кој долго го чекаме.
Систем и клупски фудбал на високо балканско ниво:
Со самиот прогрес на инфраструктура, нашите клупски натпреварувања ќе растат. Првата лига мора да стане натпреварување кое ќе го гледа и едвај ќе го чека секој македонски вљубеник во спортот. Полни трибини, унифициран план на организација на сите клубови, ТВ права и реализација на натпреварите на високо балканско ниво, нови фудбалски емисии и исполнети стадиони. Ако се доближиме до српскиот врв и комплетната хрватска лига во начинот на организација, квалитет и буџет, веќе сме направиле голема работа.
