Во последните осум дена, од 9 до 26 ноември, битката со коронавирусот ја загубија 209 болни, од кои 44 се од Скопје. Инфектологот д-р Вело Марковски во врска со справувањето со коронавирусот смета дека најголемата грешка е тоа што на пациентите им се сугерира да седат дома, да се јавуваат по телефон и да не одат на лекар.
Понеделник беше најцрниот ден во Македонија од почетокот на пандемијата со ковид-19. Починаа 40 лица од кои, најмногу, дури десет се од Скопје од каде е и најмладиот починат пациент, на 49 години. Втор град на листата со најголем број починати е Прилеп. Таму битката со ковид-19 ја загубија 5 пациенти. Во Штип, Велес, Битола и Гостивар има по тројца починати. По двајца починати има во Куманово, Струга, Кавадарци и Кичево, а по едно лице ја загуби битката со вирусот во Тетово, Гевгелија, Струмица, Крушево и Свети Николе. Само едно лице починало во домашни, а останатите во болнички услови.
Во изминатото деноноќие се направени вкупно 1.683 тестирања, од нив позитивни на коронавирусот се 591 лице, или 35 отсто од тестираните. Најголем број од новопотврдените случаи се од Скопје – 218 случаи, потоа следуваат се Куманово со 47, Гостивар со 46 нови случаи, 36 регистрираше Битола, 29 Кичево, во Тетово 28, Прилеп 26, Штип 21. Регистрирани се и 439 оздравени пациенти.
Според статистиката, во моментот активни се 18.488 случаи, а вкупниот број на починати стигна до 1.345 лица. По градови најголем број од активните случаи и понатаму се во Скопје, 8.614.
Од останатите градови, Тетово има 1.032 активни случаи, а потоа следува Куманово со 890, Прилеп – 879 и Велес со 762 активни случаи.
Инаку, во последните осум дена, од 9 до 26 ноември, битката со коронавирусот ја загубија 209 болни, од кои 44 се од Скопје.
Инфектологот д-р Вело Марковски во врска со справувањето со коронавирусот смета дека најголемата грешка е тоа што на пациентите им се сугерира да седат дома, да се јавуваат по телефон и да не одат на лекар.
-Генерално што е најголемата грешка. Тоа е паролата “седете дома” на пациентите, јавувајте се по телефон и немојте да одите на лекар. Штедете ги лекарите, немојте по рецепти одите во аптеки. Значи маса на луѓе оставивме без да ги види матичен лекар што е нон-сенс. Тука ние имаме проблем. И после кажуваат доцна им доаѓале пациентите. Па, како да доаѓаат кога вие им кажувате да не доаѓаат на лекар. А клиничката слика од пролетта досега е сменета кај пациентите од ковид-19. Скоро кај сите починати постои бактериска пневмонија со јасни параметри, со високо ЦРП, со висока седиментација и пореметени фактори на коагулација. И затоа пациентите треба да ги лекуваме соодветно. Не смее да се пушти пациент да не биде виден, да не биде прегледан. Другиот проблем е раното давање на антибиотици. Давање на антибиотик за време на вирусна инфекција може да има катастрофални последици. Тоа не е мој став, тоа е став на науката. Се прашувам дали се вклучени најдобрите доктори, најдобриот персонал, не можете вие да одите само со партиски членови во борбата со оваа епидемија, посочи Марковски.
Владата направи карантин кога имаше 10 или 11 проценти исполнети болнички капацитети, продолжи тој, а сега кога се преполнија болничките капацитети владата воопшто нема идеја што-како.
Инаку, точно пред една година беше регистриран првиот случај на коронавирус кај 55-годишен маж од кинеската провинција Хубеи. Научниците се сомневаат дека ковид-19 од лилјак преминал на друго животно кое подоцна го консумирал човекот, па затоа почнал да се шири меѓу луѓето.
Иако повеќе од 38 милиони луѓе се излекувале за една година, вирусот не стивнува и се чини дека врвот допрва доаѓа.
