Синот на либијскиот претседател Муамер Гадафи, Ханибал, кој од 2015 година е во затвор ја раскажа својата приказна за заробеништвото во Либан и дали има во план да се активира во политичкиот живот на Либија.

Тој во интервју за РИА рекол дека бил заробен од вооружана банда во Сирија на 6 декември 2015 година. 

“Илегално ме пренесоа од Сирија во Либан во подрачјето Бека. Тие го искористија патот кој го користи војската со цел Сиријците да не го претресуваат возилото. Таму ме држеа една недела, ме измачуваа морално и физички за да ме натераат да откријам информации за исчезнувањето на Мус ел Садр (проповедник) и двајца негови следбеници: шеикот Мухамед Јакуб, чиј син ја подготви операцијата за моето заробување во 1978 година и Абас Бадрутин”, вели тој.

Вели дека се наоѓа во затворот во Либан

“Со мене се сретна судијата кој го води случајот за исчезнувањето на Мус ел Садр и неговите следбеници. Тој случај во најкратки црти може вака да се опише: Во 1978 година за време на посетата на Либија, исчезнува Мус ел Садр заедно со двајца следбеници, Мухамед Јакуб и новинарот Абас Бадрутин. Во 1982 година овој случај му е предаден на Судскиот совет на Либан, а во 2008 година мојот татко Муамер Гадафи го обвинуваат за киднапирање на Мус ел Садр и неговите следбеници. Јас со тој случај, почнувајќи од 1981 година, ниту на било кој начин не сум имал врска, ниту сум бил осомничен, ниту сведок, ниту обвинет.

Причината за моето апсење нема никаква врска со судскиот процес. Ме уапсија поради тоа што сум син на Гадафи. Откако му реков на судијата дека не поседувам никакви информации за ел Садр ме обвинија дека кријам докази за тој случај. Во тоа време, во 1978 година јас имав две години”, вели тој.

Жената и децата досега не можеле да го посетат

“Многу се грижам за нив. Во Сирија поради сите тие настани, тие не се безбедни. За нив нема кој да се грижи. Потребен им е татко”, додава тој.

Вели дека физичката состојба не му е задоволителна. Има болки во градите, тешко дише, има болки во долниот дел на грбот, проблем со кожата поради недоволно светлина.

“Скршен ми е носот и имам хематоми на главата од ударите кои ги добив за време на мојот престој тука. Би сакал да ги замолам Обединетите Нации да испратат во Либан група на доктори да ме посетат во затвор и да направат медицински извештај за мојата здравствена состојба”, вели Ханибал.

Откри дали планира да биде дел од политичкиот живот откако ќе излезе од затвор

“За тоа многу е рано да се зборува. Сега не можам да размислувам за тоа ниту да донесувам било каква одлука. Сакам да нагласам дека во годините на мојата работа во Либија никогаш не сум работел во службата за безбедност. Бев само советник во областа на морскиот сообраќај. Сметаме на поголема улога на Русија, како голема сила во вакви случаеви и ѝ се заблагодарувам на напорите кои ги презема за моето ослободување”, вели Ханибал.