Српската премиерка Ана Брнабиќ сугерираше можна воена интервенција на Белград во Косово доколку владата од Приштина кон средината на овој месец одлучи да формира армија.
Премиерката на соседна Србија сугерираше дека било какво создавање на армија во Косово би можело да доведе до воена интервенција на Белград.
Да потсетиме, косовскиот парламент на 14-ти декември ќе гласа за формирање на косовската армија, односно за трансформација на актуелните одбранбени сили со лесно вооружување во регуларна армија.
Брнабиќ истакна дека таа нова армија би можела да биде искористена од властите од Приштина за истерување на српското малцинство од Косово. Сепак, лидерите на Косово тврдат дека тоа нема да се случи, но не треба ниту да се споменува дека довербата на релација Белград – Приштина е на многу ниско ниво.
Во разговорот во средата со новинарите во Белград, Брнабиќ истакна: „Се надевам дека војската никогаш нема да има потреба да ја користиме, но ова моментално е една од опциите кои се на маса, затоа што ние не сакаме да гледаме како се случува етничко чистење“.
Сепак, аналитичарите сметаат дека веројатноста за една таква воена интервенција на Србија во Косово е исклучително мала, посебно поради фактот што Србија настојува да стане земја членка на Европската унија, а Белград не може да се надева ниту на помош од својот традиционален сојузник Москва – посебно откако Русите во неколку наврати им го завртија грбот.
Но, треба да се истакне и дека владата на Косово нема силна поддршка од своите Западни сојузници кога станува збор за идејата за формирање на косовската армија.
Генералниот секретар на НАТО, Јенс Столтенберг отворено ја критикуваше таквата идеја истакнувајќи дека едно такво сценарио би имало „сериозни последици за иднината на Косово во евро-атлантските интеграции“.
