Научниците на Сејшелите снимиле џиновска желка како лови и јаде мала птица. Научниците вклучени во откритието велат дека ова е прв пат таков чин да биде забележан со камера. Имено, тој вид на желка досега се сметал за растителнојаден.
“Тоа е многу изненадувачко и прилично страшно”, изјавил Џастин Герлах, островски геолог. “Желката намерно ја прогонуваше оваа птица и ја уби, а потоа ја изеде. Па да, тоа е лов”, додал тој.
Цело време се верувало дека џиновските желки, кои сега се наоѓаат само на Сејшелите и на Галапагос, се растителнојадни. Всушност, се смета дека нивната вегетаријанска прехрана ги обликувала нивните екосостави, пренесува “New York Times”.
Но, во трудот објавен во понеделникот во списанието “Current Biology”, д-р Герлах и Ана Зора објаснуваат дека имало навестувања дека овие рептили би можеле повремено да ја надополнуваат својата прехрана. Желките понекогаш консумираат полжави и коски од мртви птици, кози, па дури и други желки. Но, ловот досега не бил забележан.
“Со години слушав дека понекогаш желките ги гмечат птиците за да ги изедат. Но тоа беа само анегдоти, а јас на островот минав многу години и никогаш не сум видел нешто такво”, рекол херпетологот Џејмс Гибс, кој бил многу изненаден од оваа снимка.
Според д-р Гибс, ако е желката женка, тоа може да биде важен траг и причина за шокантното однесување. Имено, на островските суштества обично им недостасува калциум, клучен минерал за создавање на лушпите на јајцата.
Иако снимката од џиновската желка која напаѓа беспомошна птица можеби делува шокантно, тоа едноставно би можело да биде еден од начините на кој животното сака да ги обезбеди идните генерации.
“Навикнати сме да мислиме дека желките не се посебно интересни, бавно се движат и веројатно се прилично глупави”, рекол д-р Герлах за џиновските желки. “Но, очигледно постои нешто многу интересно за тие животни”.
