Столе Стоилов поради повреда нема да може да ѝ помогне на Македонија на гостувањето во Данска. Но, големиот борец бил под знак прашалник и за првиот меч, ама решил да стисне заби и да „изгине“ за националниот тим, открива селекторот Кирил Лазаров.
Ракометарот на Вардар имал болки во грбот и пред дуелот со светскиот првак во Скопје, ама не можеле да го разубедат, знаејќи ја неговата желба да игра за својата држава. Во отсуство на Стоилов, шанса во Алборг ќе добие Михаил Аларов, пивотот на Пролет.
„Со Столе разговараме денес и искрено, тој беше неизвесен и за настапот на првиот меч со Данска, ама добро го познаваме каков борец е и каков човек е кога се работи за Македонија, па сам инсистираше да игра. Јас му понудив да не игра поради неговото здравје, ама тој ни се стави на располагање и реши да изигра за Македонија. За тоа јас сум му многу благодарен. Сега по заеднички разговор го ослободивме од репрезентативните обврски, има проблеми со грбот и се надевам дека брзо ќе се врати во тимот на Вардар и ќе му се стави на располагање на тренерот Алушовски. А ние ќе имаме прилика да провериме уште еден пивот во Данска, тоа е Михаил Аларов, на кого сметаме сериозно и за понатаму“, изјави Лазаров.
Аларов на пивотменската позиција на гостувањето кај Данска (понеделник, 16:00 часот) ќе дели минутажа со Жарко Пешевски.
