Украинскиот режисер Станислав Капралов објави снимка на која можат да се видат стравичните последици од пожарите кои ја зафатија зоната околу чернобилската електрана.
На видеото можат да се видат илјадници хектари запалена шума и напуштени објекти, додека истовремено е регистрирана зголемена радијација. Капралов на Фејсбук напиша дека таквите сцени кај него предизвикале да добие чувство на апсолутна апокалипса.
„Сакам да ја пренесам атмосферата од тоа што го видов. Во изминатите 30 години на човечко отсуство во зоната на Чернобил, флората и фауната оживеаа и станаа тоа што беа пред 150 години, дури и покрај зрачењето. Сега голем дел од препороденото е уништен. Ова е војна на човекот и природата“, изјави Капралов.
Во Украина претходно во текот на месецот изби пожар во чернобилската шума кој се прошири дури до напуштената електрана. После долгата борба пожарот беше локализиран, а покрај уништувањето на шумата, забележано е зголемено ниво на радијација.
