Вистинска драма се одвивала во понеделникот на пистата на сараевскиот аеродром кога избил судир меѓу припадниците на Граничната полиција на БиХ и членовите од личното обезбедување на турскиот претседател, Реџеп Тајип Ердоган.
При слетувањето на авионот во кој се наоѓала турската делегација, членовите на обезбедувањето на Ердоган поради недолично однесување и одбивање на процедурата и редовната контрола дошле во вербален, а потоа и краток физички судир со припадниците на Граничната полиција на БиХ, која е надлежна за Меѓународниот аеродром во Сараево.
По судирот дошло до туркање, а членови на турското обезбедување од авионот извлекле и оружје, па го ставиле на појасите, а се се смирило кога од авионот излегол Ердоган.
Инаку, ова не е прв пат обезбедувањето на турскиот претседател да дојде во центар на вниманието.
На пример, кога во 2017-та година Ердоган бил во Њујорк да присуствува на 72-рата седница на Генералното собрание на ОН, избил инцидент во хотелот “Мериот Маркиз”.
По говорот на Ердоган, кој го држел на турски јазик, станало момче од публиката и извикало “Ти си терорист! Оди си од мојата земја!”. После тоа настанал општ хаос во салата.
Обезбедувањето почнало на сила да ги исфрла демонстрантите, од кои некои завршиле на подот.
Не е познато дали обезбедување била американската Тајна служба, лични чувари на Ердоган или хотелското обезбедување.
Претходно, при посетата на Ердоган на Вашингтон, телохранителите насилно и дивјачки се пресметале со демонстрантите додека тој мирно гледал од службениот автомобил.
Можеме да се потсетиме и на случај од 2016-та година, кога обезбедувањето тепало група жени кои протестирале поради говорот на Ердоган во Еквадор.
Три активистки почнале да викаат “убиец, убиец”, по што меѓу седиштата влетале припадници на обезбедувањето и почнале да ги влечат жените и да ги изнесуваат од салата. Тие сакале да привлечат внимание кон турската воена интервенција против Курдите.
Обезбедувањето ги тепало и фаќало за лицето, градите и интимните делови од телото.
Освен тоа, припадниците на личното обезбедување на Ердоган во 2011-та година го претепале обезбедувањето на зградата на ОН, кое не сакало да ги пушти да минат на влезот кој бил затворен.
