Легендарниот англиски фудбалер Џими Гривс по одличната кариера во фудбалот бил успешен спортски новинар и коментатор, па така во текот на 80-тите години го интервјуирал тогаш младиот Мајк Тајсон.
„Челичниот“ Мајк тогаш имал само 21 година и бил светска сензација, а Гривс го интересирало која е техниката со која што своите ривали тој ги победува молскавично.
Набрзо сфатил дека можеби не требал да го постави тоа прашање…
„Удирам нагло, моите раменици и нозе носат прецизни и јаки удари во исто време. Кога ќе те погодам, ‘бум, бум’, ескивирам и се наоѓам на страната на која што не можеш да ме удриш“, раскажал Мајк, но кажувајќи го тоа со рацете упатувал удари кон лицето на Џими.
Гривс, кој што во 1966 година со Англија бил првак на светот, во тој момент изгледал многу збунето, па и шокирано со тоа што го видел…
„Да, сфатив…“, изјавил Гривс.
„Моето мото е ‘убиј или биди убиен’“, кратко ја објаснил својата филозофија Мајк.
Сето тоа се случило кога боксерот имал скор од 34 победи без пораз, а поголемиот дел од триумфите ги остварил со нокаут во првата рунда.
Гривс во текот на интервјуто го прашал Тајсон кој му е омилен боксер:
„Можеби не е најдобар, но мојот омилен е Џо Луис. Затоа што имаше сè, би можел да го опишам како мајстор на овој спорт. Тој одбиваше да изгуби“, открил тогаш најмладиот шампион во тешка категорија во историјата на боксот.
