Топлотниот бран кој оваа седмица го зафати Израел во средата го достигна врвот во Содом покрај Мртвото море каде што беа измерени неверојатни 49,9 Целзиусови степени, пренесуваат израелските медиуми.
Станува збор за највисоката температура измерена од основањето на еврејската држава во 1948-ма година и втората највисоко регистрирана температура на тоа подрачје откако започна мерењето на температурите во 20-тите години од минатиот век кога со регионот владееше Велика Британија.
Највисоката температура забележана на територијата на денешен Израел изнесувала 54 Целзиусови степени во 1942-ра година на северот на Долината Јордан.
Иако и во минатото во оваа земја на Блискиот исток имаше високи температури, новиот рекорд покажува дека глобалното затоплување влијаат на просечните температури, како и на екстремно високите температури, соопштија од израелската метеоролошка сужба. Од метеоролошката служба на Израел очекуваат и во иднина да бидат регистрирани рекордно високи температури.
Топлотниот бран ја зафатил целата територија на Израел и не е карактеристичен за јули. Исто така, на повеќе места имаат избиено пожари, поради што во некои области е евакуирано локалното население.
Влажноста била многу ниска од 10 до 25% дури и на бреговите, а повеќе метеоролошки станици забележале дека ширум земјата за неколку степени се зголемени температурите во однос на минатата година која што исто така беше рекордна.
Екстремно топло време долж брегот на Средоземното море се случува всушност ретко, односно еднаш на пет до десет години, но во последната деценија тоа се случува се почесто, односно на секои две до три години.
