Трамп ги исмева Французите поради војската: Учеа германски пред да дојдеме

775

Американскиот претседател, Доналд Трамп, благо кажано, не е воодушевен од идејата на Емануел Макрон и Ангела Меркел за создаваање на европска војска. А сега, поради тоа, тотално побеснал на Твитер и се шегувал на сметка на Французите поради поразот во Втората светска војна.

Тој уште минатата седмица го нарекол предлогот на Макрон “многу навредлив”, поради тоа што Маркон во интервју рекол дека на Европа и е потребна сопствена војска за да не зависи од САД. Во истото интервју навел дека Франција “мора да се заштити од хакувањето од страна на Русија, Кина, па дури и САД”, што Трамп намерно или ненамерно го разбрал како Маркон да се збунил за заштитата поради која е потребна европска војска.

Сепак, изгледало дека францускиот и американскиот претседател ги расчистиле несогласувањата кога се сретнале на комеморацијата за крајот на Првата светска војна во Париз.

Но, новиот испад на Трамп на Твитер сугерира дека од помирување со Макрон нема ништо. Во бизарната, и може да се каже, некохерентна низа твитови, Трамп отворено ги исмевал Французите.

“Емануел Макрон предложува основање на војска за да ја заштити Европа од САД, Кина и Русија. Но, Германија беше непријател во Првата и Втората светска војна – како тоа резултираше за Франција? Почнаа да учат германски во Париз пред да дојдат САД. Платете за НАТО или немојте”, гласи твитот со кој Трамп го почнал својот виртуелен напад на Франција.

Трамп потоа се префрлил од НАТО на својата втора најголема замерка до европските сојузници – трговијата: “Кога станува збор за трговијата, Франција прави одлично вино, тоа се прави и во САД. Проблемот е што Франција многу им попречува на САД да ги продаваат своите вина во Франција и наплаќаат високи царини, додека САД го олеснува увозот на француски вина и наплаќаат многу ниски царини. Не е чесно, мора да се промени”.

Одговорил на прозивките дека не отишол на американските гробишта поради дождот

“Проблемот е што Емануел пати од многу нискиот рејтинг за поддршка во Франција, само 26%, и стапката на невработеност од речиси 10%. Тој само се обидува да ги префрли на друга тема. Попатно, нема земја која е понационалистичка од Франција, многу горд народ – и со право”, напишал Трамп, одговарајќи му така на Маркон на неговата остра критика на национализмот, која ја изнел во својот говор во Париз.

На крајот тоа го зачинил со варијација на темата на својот предизборен слоган: “Да ја направиме Франција повторно голема”.

Трамп не одолеал ни да одговори на масовните прозивки, згрозувања и исмејувања поради тоа што ја пропуштил посетата и положувањето на венецот на американските воени гробишта, на некои 200 километри од Париз. Од Белата куќа тоа го оправдале со дожд, поради кој претседателскиот хеликоптер наводно не можел да полета.

“Попатно, кога хеликоптерот не можеше да полета поради слабата видливост, предложив да возиме до таму. Тајната служба ми кажа дека не може, дека е предалеку од аеродромот и дека има голема блокада во Париз. Говор следниот ден на американските гробишта по дождот! Малку извештаи – лажни вести”, напишал Трамп во последниот твит.

ПОВРЗАНИ НАПИСИПОВЕЌЕ ОД АВТОРОТ