Американскиот претседател Доналд Трамп изјавил дека “многу чудни работи се случуваат” во врска со потеклото на коронавирусот и вели дека е убеден дека Кина има поголем број на починати отколку што кажуваат официјалните податоци.
Трамп порачал дека неговата влада се обидува да утврди дали вирусот потекнал од кинеска лабораторија.
“Многу чудни работи се случуваа, но во тек се многу истраги. И ние ќе дознаеме”, им рекол Трамп на новинарите во Белата куќа, откако Fox News изнел тврдење дека вирусот потекнува од лабораторија во Вухан, пренесува Reuters.
Американскиот претседател Доналд Трамп се сомнева во податоците за бројот на починати од коронавирусот во Кина, кој Пекинг го променил во петокот.
Пекинг соопштил дека 1.300 луѓе кои починале од коронавирусот во Вухан, не биле вброени во официјалните податоци, но ги отфрлил обвиненијата дека станува збор за затскривање на бројот на жртви.
Од друга страна, Трамп е уверен дека сигурно повеќе лица починале во Кина отколку во САД, земја која моментално е жариште на пандемијата на вирусот, со повеќе од 700.000 заразени и повеќе од 37.000 жртви.
“Ние немаме најголем број на жртви во светот. Најмногу мора да има во Кина. Тоа е огромна земја. Мина низ огромен проблем со ова, огромен проблем – сигурно имаат најмногу”, рекол Трамп.
