Која холивудска миленичка ја заклучувале во школскиот плакар, нарекувајќи ја грда и дебела? Кого соучениците везден го навредувале заради познатото семејство? Кому бојата на косата му го загорчила детството?
Тие денес се обожувани и почитувани. Имаат милиони фанови и поддржувачи низ светот. Меѓутоа, во детството и младоста, дури ни ѕвездите не биле поштедени од горкиот општествен проблем – врсничкото насилство.
Ова се славните личности кои биле малтретирани од врсниците:
Ријана
Убавата пејачка од Барбадос била жртва на дискриминација поради светлата боја на кожата. Планетарниот успех што го доживеа неколку години подоцна, претставува нејзината најдобра одмазда. Во интервјуто за Allure во 2008 година, Ријана првпат прозборе на оваа тема:
„Не ми беше јасно. Околу себе гледав луѓе со различна боја на кожата, а јас имав светол тен. Соучениците ми се потсмеваа бидејќи бев премногу „бела“.“
Тејлор Свифт
Нејзините хитови ги покорија светските топ листи, ама не и музичкиот вкус на соучениците во средно училиште. Тејлор Свифт многупати се пожали дека не била популарна и омилена помеѓу врсниците во тинејџерските години.
Таа не припаѓала на групата „кул“ деца, туку ѝ се потсмевале за песните:
„Чудно им беше што сакам кантри музика. Ме исмеваа. Не ме запреа да си ги остварам соништата. Неколку години подоцна се вратив во родниот град, а дел од девојките што ме малтретираа, ги затекнав во мои маици, чекајќи да земат автограм од мене. Беа заборавиле колку злобно се однесуваа во минатото. Тогаш сфатив дека треба и јас да што поскоро да ги избришам од меморијата.“
Ед Ширан
Тој е дефинитивно најпознатиот црвенокос пејач на денешницата. Сепак, во повеќе наврати, Ед Ширан навести дека бил жртва на врсничко насилство токму поради бојата на косата, како и необичниот изглед.
„Кога бев мал, децата на училиште ме задеваа. Бев чудак. Многу чудно дете. Пелтечев додека зборував. Носев џиновски oчила. A, згора на сè имав проблеми и со тапанчето во едното уво, па може да си замислите како ми беше.“
Кајли Џенер
Да. Звучи неверојатно, но дури и мегапопуларната старлета е некогашна жртва на насилство во адолесценцијата. Најмладата членка на кланот Кардашијан, неодамна се исповеда дека била мета за напади на училиште, исклучиво поради славата на нејзиното семејство.
„Имав девет години кога почна да се прикажува шоуто. Оттогаш трпам невидено малтретирање од другите. Дури растев, ги слушнав најлошите навреди што некој може да ги каже за мене. Целиот свет ме осудуваше. Насилството ми обележа голем дел од животот. Затоа се свртев кон луѓето кои имаат посериозни проблеми од моите. Тие ме инспираа да ги издржам нападите од хејтерите. “
Деми Ловато
Поранешната дизниева ѕвезда стана позната од мали години. За освојување на врсниците, пак, потребно ѝ било многу повеќе труд и време. Во документарниот филм „Simply Complicated“, Деми Ловато проговоре за искуството со насилниците:
„Кога имав 12 години, ме малтретираа до таа мера што развив социјална анксиозност. Немав доверба во девојчињата на моја возраст. Сè се промени кога се спријателив со едно од „популарните“ деца. Заедно пораснавме и поминавме низ сешто. Најважно во животот е да бидете толерантни, сакајќи се себеси и прегрнувајќи ја својата убавина.“
Кристијан Бејл
Англискиот актер се стекна со светска слава на само 13 години, благодарение на филмот „Empire of the Sun” од Стивен Спилберг. Претешко го поднел враќањето на училиште, каде љубоморните соученици го одбрале како лесна мета за напади. Кристијан Бејл си ја отвори душата за порталот Digital Spy:
„Не уживав ни миг во славата. Бев жртва на насилство. Децата секојдневно ме удираа и клоцаа. Ова ми беше рана лекција како снимањето филм може да ве издвои од околината. Ако не сакате да живеете со последиците, тогаш не правете го тоа. Мене ваквото сознание не ми беше од помош. Ме збунуваа туѓите реакции на моја сметка, подеднакво добри и лоши.“
Кејт Винслет
Таа повеќе од две децении е миленичка на филмската публика. Доколку ги послушала зборовите на „хејтерите“, никогаш не ќе беше она што е денес. Во тинејџерските години, врсниците ѝ се потсмевале на Кејт Винслет, правејќи да се почувствува несигурна заради телото и тежината:
„Ме малтретираа на училиште. Ме нарекуваа со погрдни имиња. Ме задеваа затоа што сакав да глумам. Ме заклучуваа во плакарот. Ми се смееја. Не им бев доволно убава. Имав големи стапала. Знаете ли што ми помогна да си ги остварам соништата? Тоа што верував во себе. Мора да бидете неуништиви. Да го правите она што го сакате, верувајќи дека сте достојни да успеете. Некогаш ова е најтешкиот дел.“
Лејди Гага
Откако се појави на музичката сцена, таа храбро им пркоси на стереотипите и предрасудите. А, во раните години, живеела со уверението дека не вреди пет пари, затоа што константно била обезвреднувана. Во интимната исповед за The View, Лејди Гага се потсети на минатото:
„Навистина ме малтретираа. Имав фина група на пријатели, ама на училиште бев везден понижувана. Ова ќе ме следи до крајот на животот. Не бев ни свесна колкаво влијание имаше врз мене, додека не станав позната, па се зголеми притисокот да им бидам пример на другите. Морав да се задлабочам во себеси и да се запрашам: „Што јас имам да понудам?“. Со години чувствував дека немам ништо вредно да им понудам на луѓето.“
Џастин Тимберлејк
Тешко е да се замисли дека една од најпосакуваните тинејџерски ѕвезди во ’90-тите, а подоцна пејач и глумец со сериозна кариера, некогаш бил момче кое не го сакале врсниците. Примајќи ја наградата за иноватор на iHeartRadio Awards во 2015 година, Џастин Тимберлејк го даде следниот говор:
„Додека раснев, никој не ме нарече иноватор на училиште. Напротив. Ми викаа дека сум поинаков и чудак, како и неколку други зборови кои не се примерни да ги кажам на телевизија. Благодарен сум ѝ на мојата мајка, која ме научи дека различноста е добра работа. Кога сте различни, поседувате моќ да направите суштинска разлика во светот. Затоа вечерва сакам да ѝ се заблагодарам на мајка ми.“
Џенифер Лоренс
Оскаровката која не се плаши јавно да го искаже личниот став, во минатото била замолчувана и понижувана од врсниците. Не можејќи да го поднесе притисокот, се селела од едно во друго училиште. Џенифер Лоренс нерадо се сеќава на тинејџерските години, што го потврди и за Fox News:
„Често менував училишта додека бев во основно школо, бидејќи дел од децата беа претерано злобни кон мене. Особено девојчињата.“
Кристина Агилера
На неа болката ѝ послужи како инспирација да ги испее најголемите хитови во музичката кариера. Воедно, стиховите на Кристина Агилера се и охрабрување за сите оние кои се на исти или слични маки како нејзините:
„Дефинитивно имам искусено секакви облици на насилство. Затоа и ми беше важно да ги напишам песните „Beautiful“ и „Fighter”. Албумот „Lotus“, пак, симболично го посветив на цветот што го издржува тестот на времето.“
Барак Обама
Поранешниот претседател на САД е првиот политичар со афроамериканско потекло што се најде на оваа позиција. Говорејќи за врсничкото насилство во училиштата, Барак Обама призна во една пригода дека и самиот бил жртва на малтретирање:
„Како возрасни луѓе, сите се сеќаваме на сцените кога едни деца малтретираа други низ ходниците или во дворот на училиштето. Со големите уши и името кое го имам, ниту јас не бев имун, а ни поштеден од задевање.“
Џесика Алба
Како и мнозинството холивуски имиња, така и занесната убавица млада се проби на филмската сцена. Во даденото интервју за британскиот весник Daily Mail, пак, Џесика Алба откри дека средношколските денови не ѝ биле ни малку среќни и прекрасни:
„Толку многу ме малтретираа, што мораше татко ми да ме брани. Тој ме испраќаше до училиште за да не бидам нападната. Ручав во школската амбуланта, само да не мора да седам со другите девојки. Покрај тоа што сум од мешана раса, моите родители немаа пари, па никогаш не носев убава облека или штосен ранец.“
Принцот Хари
Многумина претпоставуваат дека никој нема храброст нешто да му противрече на член од кралското семејството, а камоли да се потсмева со него. Меѓутоа, дури и синот на Чарлс и Дијана се соочил со подбивање од врсниците.
Причината? Неговата портокалова коса, откри близок извор за Daily Mail.
„Во армијата го нарекуваа „портокалов магнет за куршуми“, па дури и носеа перики со црвена боја, наводно за да ги збунат непријателите околу вистинскиот идентитет на принцот. Нему воопшто не му беше пријатно.“
Мајли Сајрус
Младата пејачка и актерка им стана идол на најмалите, благодарение на ликот Хана Монтана. Таа самата, пак, морала да се одбрани од нападите на врсниците на училиште, иако била немоќна.
Во книгата „Miley Cyrus: Miles To Go”, Мајли Сајрус се исповеда дека во тинејџерските години се чувствувала мизерно и осамено:
„Додека учев во Тенеси, постојано бев задевана од соучениците. Стравував дека вербалните конфликти ќе прераснат во физички. Нивното малтретирање ги прејде границите на нормалата. Девојките беа крупни и тешки, а јас ситна и ниска. Можеа да ми нанесат сериозни повреди на телото.“
Мајкл Фелпс
Американскиот пливач поседува рекордни 28 олимписки медали. Неговите родители се развеле кога имал само девет години, па пливањето му претставувало своевидно бегство и терапевстско искуство. Сепак, детството на Мајкл Фелпс му го загорчиле постојаните навреди од врсниците:
„Другите деца ме исмеваа поради ушите. Тоа ми беше голема фрустрација во младоста. Но, кога еден ден се вратив во родниот град, тие исти луѓе беа желни да направат муабет со мене. Си помислив: „А, сега ми зборувате, така? Некогаш ми се мајтапевте!““
