Три девојки, Босанки, онлајн ја отпејаа македонската песна „Море сокол пие”, а нивната фантастична изведба нема шанси да не ве воодушеви.
Медина Турковиќ, Селма Дроце и Шејла Гргиќ се имињата на овие прекрасни дами, со магичен глас. Со оваа онлајн изведба, вклучувајќи се од Мостар односно Сански Мост и Сараево, каде живее секоја од нив, се чини го разгалија цел Балкан.
Fashionel.mk стапи во контакт со нив. Велат, никој не очекувал дека видеото ќе предизвика такво внимание, но се радуваат што е така:
„Сите три сме академски образовани музичарки, завршивме Музичка академија во Сараево. Ова видео се случи на пријателска основа, од спонтана дружба. Сите три сме пријателки и сите се занимаваме со музика, но не заедно. Со оглед на оваа ситуација во целиот свет, сите сме во своите домови, па сакавме да снимиме нешто за изолацијата полесно да ја поднесеме“, вели Медина.
„Море сокол пие“ е песна што ја сакаат трите, па затоа и била нивен избор. Иако досега немале близок контакт со Македонија или нашиот народ, сепак ја имале среќата да ја слушаат од мали.
„Имав среќа да растам во семејство на музичари. Мојот татко со својот бенд свиреше често македонска музика, но и генерално, музика која припаѓа на балканскиот фолклор. Така, уште од дете бев соочена со тој звук“, открива Селма.
Како додава, изолацијата сите нè дочека неподготвени, бидејќи преминавме на некој друг начин на живот. Сепак, се трудат да се организираат, да ги вршат своите обврски, да го чуваат семејството и секако да ја негуваат музиката, што и покажаа.
Шејла Гргиќ е член на познатата босанска група „Диванхана“, но вели, уште од студентските денови овие три пријателки имале желба да направат нешто заедно.
„Сакавме да снимиме нешто, но од чиста љубов кон она што го правиме – музиката, пеењето и затоа и не очекувавме дека овој видео ќе предизвика некаква реакција, но ете, се случи неочекувано. Не планиравме да има други видеа, но не е исклучено. Можеби сепак и ќе повториме“, вели Гргиќ.
Таа додава дека не е изненадување што одбрале македонска песна, бидејќи сите ја сакаат македонската музика.
„Како професионални и образовани музичари, имаме тенденција и потреба да ја истражиме сета музика на светот, па така и нашата Балканска. Уште на музичка академија, да кажам, студиозно и сериозно ја проучувавме традиционалната музика на сите народи од нашето поднебје, па така ни македонската не беше исклучок. Сите ја сакаат македонската музика и сакаат да се фатат во „коштец“ со неа, бидејќи за секој сериозен музичар таа претставува предизвик, пред сè, поради својата богата ритмика и динамика, објаснува Шејла.
На крајот, ова видео уште еднаш покажа дека музиката секогаш има моќ на обединување:
„Тоа е всушност нејзиниот универзален јазик, кој не познава граници и кој секој може да го разбере на свој начин. Во секоја музика имате нешто убаво, секој може себеси да се пронајде макар во едно мало делче во секоја песна, само треба да се биде со доволно отворено срце и ум, за да се почувствува сета нејзина убавина“, порачува Гргиќ.
Инаку, за речиси неполн еден ден, нивното видео е споделено преку 4.000 пати (досега).
