Стотина воени ветерани пристигнаа во Франција каде што им оддадоа почит на оние кои што го дадоа својот живот за време на инвазијата на Нормандија во Втората светска војна.
Пред 75 години сојузничките трупи ја извршија најголемата инвазија, позната како „Денот Д“ – инвазија која го одреди текот на војната во корист на земјите кои се бореа против Нацистичка Германија во Втората светска војна.
На комеморацијата присуствуваа и лидерите на победничките сојузнички земји, претседателот на САД, Доналд Трамп, потоа премиерката на Велика Британија, Тереза Меј, како и нивниот домаќин, францускиот претседател Емануел Макрон.
„Овие луѓе ѝ припаѓаат на најголемата генерација“, порача Тереза Меј, додека Макрон додаде: „Во име на нашата нација, само сакам да ви речам благодарам“.
„Вие сте меѓу најголеемите Американци кои што некогаш живееле“, порача американскиот претседател Доналд Трамп, додека воените ветерани едвај ги задржаа своите солзи за време на церемонијата.
93-годишниот Хари Билинџ од Корнвал пристигна да им оддаде почит на своите загинати соборци. Тој во изминатите години собирал парични средства за изградба на споменик – предал повеќе од 10 илјади фунти на Нормандискиот меморијален фонд, откако собирал донации во неговиот град.
„Меѓусебната љубов на ветераните од Нормандија е поголема од љубовта кон жените. Ако сте во дупка во земјата, или сте во десантен чамец, мора да го препознаете својот соборец“, изјави Билинџ.
Тој на своја 18-годишна возраст како кралски инжинер пристигнал на таканаречената Златна плажа (една од петте плажи на кои Сојузниците извршиле инвазија на 6-ти јуни 1944-та година покрај Меч, Омаха, Џуно и Јута) во 6:30 часот како дел од првиот бран на сили.
„Величенствени луѓе. Мојата генерација го спаси светот и нема да заборавиме никого од нив. Пријателот ми почина на моите раце на поле во Каен. Имаше бебе старо само три седмици. Ме однесоа на 60-годишнината да видам каде е погребан“, изјави Билинџ, а откако новинарката му рече дека сега сите му се благодарни, тој додаде:
„Не ми се заблагодарувајте и не ми говорете дека сум херој. Јас не сум херој. Јас само имав среќа. Тука сум. Сите херои се мртви. И никогаш нема да ги заборавам, се додека сум жив“, изјави Билинџ.
Меѓу ветераните беше и 94-годишниот Англичанец од Норич, Лен Фокс. Тој бил истоварен на плажите во Нормандија на „Денот Д“ во рамките на 53-та велшка дивизија како курир на мотоцикл.
„Да се биде овде на годишнината е мојот начин да им се оддолжам на своите другари кои не преживеаа. Не бев херој, бев преплашен 19-годишно момче. Тие беа храбри херои“, изјави Фокс.
