Украина ќе испрати воени бродови назад на своите пристаништа во Азовското море и покрај тоа неодамна во близина на теснецот Керч, Русија изврши агресија, нападна и заплени три украински брода со 24 морнари.
Украина и Русија се во конфликт од 2014-та година откако Москва започна да ги финансира терористите во источните делови на Украина и го припои украински Крим. Од тогаш, повеќе од 10 илјади лица го загубија животот во обидите на украинската армија да ја ослободи територијата која што е под контрола на про-руските терористи.
Ситуацијата дополнително ескалираше откако Москва минатиот месец во близина на Крим заплени три украински бродови, заедно со 24 украински морнари, обвинувајќи ги дека илегално навлегле во руски води додека пловеле од Црното море кон Азовското преку теснецот Керч.
САД и Европската унија веднаш побараа од Русија да ги ослободи украинските морнари и да ги врати запленетите бродови, додека американскиот претседател Доналд Трамп, во знак на протест го откажа состанокот со својот руски колега Владимир Путин на Г20 самитот во Буенос Аирес.
„Агресијата на Русија нема да не спречи во нашиот план да создадеме наша морнарица во Азовското море“, изјавил секретарот на Украинскиот совет за национална безбедност и одбрана, Олександар Турчинов за „БиБиСи“.
„Ако застанеме и се повлечеме, Русија ќе ја исполни својата цел во заземањето на Азовското море и практично ќе ја легализира окупацијата на Крим“, изјави Турчинов.
Турчинов истакна дека Киев ќе повика претставници на НАТО Алијансата и Организацијата за европска безбедност и соработка (OSCE) на украинските бродови со цел да докажат дека Украина не прекршува никакви прописи. Тој не откри кога бродовите би исполовиле кон Азовското море, туку само истакна дека тоа ќе се случи наскоро.
