Унгарија денеска објави дека ќе започне процедура за повлекување од единствениот постојан меѓународен суд во светот за воени злосторства и геноцид.
Унгарија ќе се повлече од Меѓународниот кривичен суд (МКС), изјави во кусото соопштение шефот на кабинетот на унгарскиот премиер Виктор Орбан, Гергели Гујас. Тој додаде дека „Владата денеска ќе започне постапка за повлекување, во согласност со уставната и меѓународната правна рамка“.
Изјавата беше дадена за време на посетата на Унгарија на израелскиот премиер Бенјамин Нетанјаху, против кого МКС издаде налог за апсење за војната во Појасот Газа.
Унгарската влада, предводена од десничарскиот популист Орбан, му ја упати поканата на Нетанјаху во ноември – еден ден откако МКС, со седиште во холандскиот град Хаг, издаде налог за апсење против него за злосторства против човештвото.
Унгарскиот премиер, кој е близок сојузник на неговиот израелски колега, налогот за апсење го нарече „безобразно дрзок“ и „циничен“.
Израел, од своја страна, ги отфрли обвиненијата на МКС, велејќи дека тие се политички мотивирани и поттикнати од антисемитизмот. Тој исто така изјави дека судот го изгубил легитимитетот со издавањето налог за апсење против демократски избран лидер на земја која има право на самоодбрана.
Земјите-членки на МКС, вклучително и Унгарија, се обврзани да приведат поединци за кои се издадени налози за апсење доколку пристигнат на нивна територија, но судот нема механизми да ги принуди државите да го почитуваат ова барање и се потпира на нивната добра волја.
Унгарија го потпиша документот за основање на МКС во 1999 година и го ратификуваше две години подоцна, но законот сè уште не е објавен во земјата.
