Шпанска „Марка“ објави дека тоа е несекојдневен проект во Србија, зашто одамна беше јасно дека првите две места се резервирани за вечните ривали.Дури и италијанските медиуми потсетија дека во последните 27 години само Обилиќ успеал да биде пред Партизан и Ц. Звезда. Сега во врвот е тим, кој е поддржан од Унгарија, а станува збор за град во кој има голем број жители од Унгарија.
„По Првата светска војна градот се најде во Србија, па клубот реши да игра во локалните и мали лиги, барем така беше до 2019 година, кога Бачка Топола доживеа историски успех, а заслуга за тоа има Виктор Обран. Што размислува унгарскиот премиер? Тоа е едноставно. Тој побарал од унгарскиот фудбалски сојуз да потроши девет милиони евра за создавање на една од најдобрите младински академии во Србија“, пишува „Марка“.
Првиот фудбалски клуб во Бачка Топола официјално постои од 1913 година како „Тополеј Спорт Клуб“, а во текот на Втората светска војна тимот играл во втората унгарска лига, кадешто најголем успех им бил второто место.
По војната клубот се натпреварувач во Суботичка лига, а подоцна и во српската лига. Изградбата на стадионот во Градскиот парк, кадешто се наоѓа и денес, почнала на почетокот на 1930. Во 1974 година доаѓа до фузија со ФК Панонија и така се создава ФК АИК Бачка Топола.
Најголемиот успех на клубот претставува настапот во Втората сојузна лига на поранешна Југославија. во 1980 година ја освојуваат лигата, па така се изборуваат за пласман во Западната група на Втората сојузна лига во СФРЈ. Во вториот ранг, АИК помина вкупно пет сезони, а потоа игра во третиот ранг на натпреварување.
По неколку сезони во зоната на Војводина, клубот се враќа во најсилен ранг во 1999 година и во неа останува до 2003 година. На крајот на сезоната 2002/03 поради финансиски потешкотии, АИК престанува со работа. Сениорскиот тим не се натпреварува, а во 2005 година се спојува со ФК Бајша и го добива името ФК Бачка Топола, која го продолжува натпреварувањето во четвртиот ранг.
Во клубот имало големи вложувања, а најмногу од страна на фудбалскиот сојуз на Унгарија како во изградба и средување на стадионот, така и во стабилизација на тимот и изградба на академија.
Орбан во септември минатата година бил гостин на клубот, а Бачка Топола е избрана за изградба на фудбалска академија на предлог на првиот човек на ТСЦ, Јанош Жембери.
„За сериозни работи се потребни две страни. Луѓе кои се храбри, соработуваат, имаат големи иновации. Ова е само почеток, зашто очекуваме изградба на многу спортски објекти и спортски развој на илјадници деца. Во Србија живеат многу Унгарци и логично е да сме заинтересирани за нивниот развој, посебно што младата генерација е приврзана за Србија“, вели Орбан.
