Министерката за надворешни работи на Канада, Криста Фриленд во средата изјави дека кинеските власти испитувале уште еден канадски државјанин, додавајќи дека Отава после тоа не успеа да стапи во контакт со него.
“Уште еден наш државјанин нè извести дека бил испитуван од кинеските власти”, рекла Фриленд на конференцијата за новинари во Отава, два дена откако во Кина беше уапсен поранешен канадски дипломат.
“После тоа не успеавме да стапиме во контакт со него и настојуваме да дознаеме каде се наоѓа”, рекла Фриленд додавајќи дека побарале информации за буквално сè од кинеските власти. Со оглед на тоа дека станува збор за “чувствителна ситуација”, Фриленд одбила да дава повеќе детали за неговиот идентитет.
Меѓутоа, BBC пишува дека станува збор за Мајкл Спавор, бизнисмен кој живее во Дандонга, град во близина на границата со Северна Кореја. Посебно интересно е што на неговиот Фејсбук профил можат да се пронајдат фотографии со севернокорејскиот лидер Ким Јонг Ун, инаку кинески сојузник како и со славниот кошаркар Денис Родман, кој во повеќе наврати ја посетил Северна Кореја.
Кина преку своите државни медиуми, изјави дека Спавор е под истрага поради сомнение дека се впуштил во активности кои ја загрозуваат кинеската национална безбедност.
Во вторникот беше уапсен поранешен канадски дипломат Мајкл Ковриг
Да Ве потсетиме, Отава во вторникот потврди дека Кина го уапси Канаѓанецот Мајкл Ковриг, поранешен дипломат кој работел за International Crisis Group (ICG) со седиште во Берлин.
Пекинг официјално ја извести Отава за тоа апсење. Мајкл Ковриг работел за International Crisis Group (ICG) во Хонг Конг и бил задолжен за прашањата за надворешна политика и безбедност на тоа подрачје, посебно на корејскиот полуостров.
Но, International Crisis Group (ICG) ја затвори својата канцеларија во главниот кинески град кога Пекинг го изгласа законот за невладини организации, кој стапи на сила во 2017 година, чија цел е поголем надзор над активностите од странските организации на кинеско копно.
Кина ѝ се закани на Канада со одмазда
Кина се закани дека ќе ѝ возврати на Канада, после апсењето на финансискиот директор на Хуавеи на 1 декември во Ванкувер по барање на САД.
Менг Ванџо во вторникот беше ослободена со кауција и ја чека процедурата за екстрадиција во Америка која ја обвинува дека ги прекршила американските санкции против Иран.
Канада во средата соопштила дека Кина била известена за тоа апсење истиот ден, после што кинеските власти ѝ приговарале на канадската влада дека не биле навреме известени.
“Нашите партнери не треба да го политизираат процесот за екстрадиција ниту да го користат за свои други цели, освен за барање правда во склад со законот”, рекла шефицата на канадската дипломатија.
