Израелскиот премиер Бенјамин Нетанјаху порача дека Израел ќе продолжи да се бори против иранската присутност во Сирија и ќе ја продолжи комуникацијата со Русија.
„Ќе продолжиме да се бориме против иранските сили во Сирија и истовремено ќе ја продолжиме безбедносната соработка помеѓу израелската и руската армија“, изјави Нетанјаху, иако неодамна Москва го „покачи тонот“ кон Тел Авив, после соборувањето на рускиот авион „Ил-20“, несреќа во која што загинаа 15 руски војници.
Откако по грешка сириската против-воздушна одбрана собори руски, наместо израелски авион на 17-ти септември, Нетанјаху два пати лично разговарал со рускиот претседател Владимир Путин.
„Се договоривме со Путин наскоро да се сретнат работни групи на израелската и руската војска“, изјави Нетанјаху пред да отпатува во Њујорк каде што присуствуваше на Генералното собрание на Обединетите нации.
Нетанјаху изрази искрено и длабоко жалење поради смртта на израелските војници и инсистираше дека тие настрадале исклучиво поради големата грешка на сириската против-воздушна одбрана, односно израелските авиони кои што во тие моменти вршеле воздушни напади, воопшто не биле виновни за несреќата.
Руската армија од друга страна ги обвини Израелците дека шират лажни информации околу причините за соборувањето на авионот „Ил-20“. Од руското Министерство за одбрана порачаа дека според радарските снимки, израелските авиони летале над рускиот авион и го искористиле како штит од сириската против-воздушна одбрана.
Иако Русите се заканија и веројатно веќе го распоредуваат напредниот против-воздушен систем „С-300“, сепак Москва не превзеде никаков конкретен чекор, со оглед на тоа што непосредно после соборувањето на авионот порачаа дека „ќе се одмаздат“.
Од друга страна, израелскиот министер за одбрана Авигдор Либерман, во интервју за военото радио порача дека Израел нема да престане со воздушните напади со Сирија.
