Светот се урнал околу 46-годишната Канаѓанка, која во Сирија станала “невеста на ИСИС”, кога почнале да паѓаат бомби на Багуз, едно од последните упоришта на терористите покрај брегот на Еуфрат во близина на ирачката граница.
Жената, потпишана само како Кимберли, се нашла во бегалски камп под контрола на Курдите, по што, заедно со река од 20.000 цивили, побегнала од порачјето кое константно и со помош на САД го бомбардираат силите на СДФ предводени од курдските борци. Тука на репортерите на британската телевизија ITV им објаснила дека во Сирија дошла како хуманитарец во желба да им помогне на жените и децата, тврдејќи дека не знаела се за политичката ситуација.
“Последните три недели беа целосен хаос. Тука цело време паѓаат бомби, луѓето цело време бегаат, извлекуваме тела и деца од урнатините. Би им порачала на жените кои останале таму со децата слободно да дојдат. Тука ќе им биде добро. Би им порачала на семејствата дома да не ни судат преостро”, рекла Кимберли.
Таа сака да се врати во Канада за повторно да биде со своите, а нејзината сестра тврди дека постапила ирационално.
“Тие луѓе многу пропатиле и потребна им е помош како и поддршка од нивните држави, инаку постои ризик да станат уште поголем проблем ако бидат отфрлени”, моли за милост Канаѓанката.
По офанзивата на селото Багуз, голем број на странци побегнале од трупите на СДФ, а се претпоставува дека во областа нешто поголема од 5 километри квадратни останале уште околу 500 борци на ИСИС.
Британската телевизија на крајот од извештајот поставила прашање што ќе биде кога ќе падне и последното упориште на џихадистите, а нивната идеологија остане во срцата на оние кои некогаш живееле под знамето на калифатот.
