Еден од домаќините на јубилејниот шампионат ни додели интересна улога, да ги замениме на дуелите со Австрија и со Украина во јуни
И романските медиуми се воодушевени од македонската фудбалска приказна што не доведе до прв и историски пласман на Европско првенство, а ни доделија и интересна улога.
„Македонците се вистинската фудбалска приказна во премиерното издание на Лигата на Нации. Погледнете како се радуваа по победата во Грузија. Тие се фудбалската бајка. Романија за жал нема да игра, па некако доаѓа дека Македонците ќе бидат Романија во Букурешт на Европското првенство“, коментираат новинарите во Романија.
Романците испаднаа и на некој начин ни го отстапија нивното место, па против Австрија на 13. јуни и со Украина на 17. јуни јасно е на чија страна ќе бидат.
Македонија ако стивне кризата со корона-вирусот ќе има огромна поддршка од своите навивачи, кои во нормални услови сигурно ќе направат вистинска инвазија на Букурешт, а можеме да сметаме и на симпатии од романските симпатизери на фудбалот.
Со Австријците, ако нема промени во планот на УЕФА за ЕП ќе играме од 18 часот, додека против Украина почетокот на мечот е закажан за 15 часот.
Македонија ќе игра уште еден натпревар во Ц групата во дебито на големите натпреварувања, а гигантот Холандија ќе ни биде домаќин во Амстердам на 21. јуни од 18 часот.
Двете пропласирани селекции од сите шест групи ќе се пласираат во осминафиналето, а шанса да одат п-онатаму имаат и четири од шест најдобропласирани трети репрезентации во своите групи.
