Министерот за здравство, Венко Филипче, гостуваше во „24 Анализа“, каде одговори на шпекулациите и откри дека не е точна информацијата дека тој е веќе вакциниран.
Филипче исто така демантираше и дека се плаши да се вакцинира.
„И едното и другото не се вистина. Уште на почетокот на тој процес кажав дека дефинитивно лично ќе се вакцинирам тогаш кога ќе стигнат првите поголеми дози на вакцини“, вели министерот.
Тој со доза на воздржаност најави пристигнување на вакцините од АстраЗенека на 31 март и 15 април, додека кинеските вакцини би требало да пристигнат на 31 март, пренесува „Прес 24“.
Филипче, помеѓу другото, додаде и дека се води сметка сите вакцини и лекови да се соодветно испитани и да ги имаат соодветните сертификати за квалитет, како и да се потврдени од регулаторните тела. Во однос на ставот на Европската агенција за лекови дека вакцината на АстраЗенека е безбедна, министерот посочи дека во однос на оваа вакцина посебно водат сметка и за тоа што го кажуваат националните агенции во ЕУ, кои времено го запреа вакцинирањето и ги следат сите релеватни истражувања.
„Националните агенции на земјите каде што имаше несакани ефекти од вакцината преземаа мерки на претпазливост и времено го запреа вакцинирањето со „АстраЗенека“. Што е нормално, да бидат внимателни и да се утврди ако има причинско последична врска. Релевантна институција за тоа е Европската агенција за лекови, која излезе денеска со став дека дефинитивно не станува збор за компликации, заради кои што треба да се прекине. Дефинитивно вакцината е безбедна и нема причинско последична врска со овие случаи и верувам дека имунизацијата ќе продолжи“, вели тој.
