Директорката на скопското средно училиште “Никола Карев” била снимена како им упатува закани на учениците кои протестираат за загадениот воздух. На видеото јасно се слуша со кои зборови таа им се обраќа на децата.
Ваквиот нејзин потег е скандалозен и осуден од јавноста, а уште позагрижувачки е фактот што, според некои информации, ова не е единственото училиште во кое децата се жртви на притисок и закани да не излезат на протест.
“Мртва тишина! Тој што вика “ууу” уште еднаш нека викне, не ми смета. Може повторно и другите да викаат”, вели директорката и додава: “За секој случај, да ве информирам. Имам информации дека само “Никола Карев” протестира и нема настава. За последиците не ви гарантирам”, им се обраќа директорката на видеото на учениците.
Освен тоа, во медиумите се појавија и фотографии на кои се гледа како таа ги фотографира лицата на малолетните ученици кои ја бојкотираат наставата во знак на револт.
*фото: Курир
Во врска со најавениот протест на средношколците од Скопје за загадениот воздух, вчера со соопштение се обрати во јавноста и Детската амбасада “Меѓаши” која нагласува дека никој не смее да им го ограничува правото на глас на учениците.
“Учениците имаат право да се самоорганизираат низ неформални форми на здружување и акции и да се залагаат за правата пред институциите кон кои се однесуваат барањата. Младите имаат енергија и решителност да го бараат од државата она што им е неприкосновено право, а тоа е чист воздух и никој тоа не може да им го забрани и ускрати. Наместо да ги казнуваме, треба да ги охрабриме, поддржиме и да им обезбедиме простор во кој ќе можат да го изразат своето незадоволство од загаденоста на животната средина и што е најважно – да се потрудиме да им го обезбедиме правото да дишат! И да им се придружиме! Во другите европски земји наставниот кадар не врши притисоци за протестите што се одржуваат секој петок – Friday For Future, напротив, во многу училишта и како предмет се воведуваат климатските промени и загадувањето на животната средина. Наставниот кадар треба да ги поттикне учениците да бидат дел од промената и да им дадат можност да ги изразат своите ставови и барања”, велат од “Меѓаши”.
Ученици од неколкуте скопски средни училишта меѓу кои и средното училиште “Раде Јовчевски Корчагин” и “Др Панче Караѓозов” исто така им се придружија на соучениците од “Никола Карев” во протестот против загадениот воздух.
За денеска е закажан “Марш за нашите животи“, кој ќе започне во 17 часот пред Министерството за животна средина и просторно планирање, а во 18 часот ќе продолжи пред Владата.
