Дел од организаторите се револтирани, исто како и дел од волонтерите. Сметаат дека ова е недозволиво, а има граѓани кои ги оставаат донациите без да прашаат дали требаат или не.

„Во црни кеси и кутии има партали кои и не можат да се наречат облека, а уште помалку помош“, коментираат организаторите.

Волонтерите кои со денови се на плоштадот, ја препакуваат облеката. Тие ги отвораат пакетите, проверуваат што има во нив, а тоа што е неупотребиво се вади и фрла. Апелираат до сите хумани граѓани, да донираат, а не пунктот да го користат за исфрлање на отпадот од дома.

Инаку, утрово, 11 камиони со донации ја поминаа македонската граница. Тие треба да стигнат до погодените подрачја од земјотресите во Турција и Сирија. Едниот камион, според волонтерите, веќе пристигнал и ги оставил пакетите со донации.

„Ова е оцрнување на акцијата“, смета еден од организаторите по фотографиите со скинатите гаќи и отпадот дониран за Турција и Сирија

Оцрнување на акцијата се фотографиите со скинатата долна облека. Ова го смета Али Февзи, еден од организаторите на хуманитарната акцијата за Турција и Сирија. Според него, со објавувањето на фотографии преку кои се реагира што наместо донации се остава отпад како помош за настраданите во земјотресот – се оцрнува трудот на волонтерите.

„Одредени луѓе сакаат да ја понижат акцијата со сликите од отпадот. Ова е блокада за нас. Не е убаво да се понижува хуманоста и хуманитарни акции. Комунална хигиена е на терен, нормално е по толку донации да има и отпад.“, вели Февзи.

Според него отпадот се чисти од донациите. Додава дека е нормално е да го има, по што потенцира: „акција од ваков тип немало ниту од самостојна Македонија“.

„Отпадот се чисти. Ние имаме своја екипа. Овој отпад е тоа што останало а е непотребно, не можеме да испратиме скинати работи или извалкани. Некои луѓе донеле непотребни работи само за да го извадат ѓубрето од дома. Важно е да се испратат што повеќе корисни работи и да се помогне на луѓето настрадани по земјотресот во Турција“, додава Февзи, еден од организаторите.