Кинеската сонда „Чанг’e-6“ денес слета на темната страна на Месечината, каде ќе собира примероци за прв пат во историјата на човештвото, соопшти Кинеската национална вселенска агенција (CNSA).

Сондата полетала кон Месечината на 3-ти мај, а слетала денес во 6:23 часот по пекиншко време, пренесува „Синхуа“.

Во текот на слетувањето бил користен автономен визуелен систем за избегнување на препреки кој со помош на камера одбира релативно безбедна зона за слетување, на основа на светлината и темнината на површината на Месечината.

Сондата потоа лебдела на 100 метри од Месечината, бирајќи конечно место за слетување користејќи 3D скенер. Кога конечно е избрано местото за слетување, моторот на сондата е исклучен и таа се спуштила со слободен пад, заштитена од безбедносна перница.

Која е мисијата на сондата

Задачата на сондата е собирање и враќање на Земјата примероци од темната страна на Месечината, што е прв таков потфат во историјата на човештвото.

Експертот при Кинеската корпорација за воздухопловна наука и технологија Хуанг Хао објаснил дека за оваа мисија е избран кратерот Аполо базен, поради погодните услови за комуникација и телеметрија, како и поради својата релативно рамна површина.

Површината на подалечната страна на Месечината, инаку, е погруба од поблиската.

Собирањето на примероци ќе трае два дена

Хуанг навел дека сондата поседува повеќе сензори, вклучувајќи микробранови, ласерски и оптички сензор кои можат да мерат далечина и брзина, но и да детектираат пречки на површината.

Собирањето на примероци од Месечината ќе трае два дена, како од површината, така и под неа.

Бидејќи управувањето на сондата е отежнато поради слабиот сигнал на далечната страна на Месечината, операцијата ефективно ќе трае 14 часа, а сондата има можност некои одлуки да носи самостојно, без интеракција на луѓе.