Манијакот кој се самозадоволуваше во автобуси на ЈСП и пред влезови на згради, Сонер Арслан, едвај собра храброст да ги погледне четирите жртви во очи.
На рочиштето, призна вина, изрази каење и ветуваше дека нема да го повтори делото. Најмладата негова жртва е 19-годишно девојче, додека највозрасната имала 24-години. Вкупно се пет, а четири беа и во судницата. Тој беше со грб свртен кон нив, па дури и кога судијката Љубинка Башевска му укажа дека не треба да и се извинува на неа, туку на оштетените девојчиња. На рочиштето на кое призна вина, Арслан, кој е роден во Турција, има 30 години и е верен, бараше поблага казна и ветуваше дека нема да го повтори делото.
„Да виновен сум. Признавам дека ги сторив кривичните дела онака како што е опишано во диспозитивот на обвинителниот предлог. Многу се каам, многу се извинувам“, кажа тој пред судијката.
„Дали ви е јасно дека ви следува санкција, дека треба да платите трошоци, дека ако некој од оштетените бара штета ќе треба истото да го платите?“, праша судијката, а тој одговори: „Јасно ми е, да“.
„Доброволно го давате признанието? Никој не ве принуди“, кажа судијката, на што тој одговори: „Со мозокот не бев добар…“, кажа обвинетиот, а судијката препраша: „Дали некој ве принуди да признаете? Дали знаете каде сте што сте?“, а Арслан одговори: „Да признавам“.
Арслан, вети дека нема повеќе да се самозадоволува пред девојки на јавно место.
„Цел живот нема да правам вакви грешки. Многу се каам. Татко ми е стар, јас само со него живеам, не може да работи. Во април ќе се женам ќе имам свадба. Барам помош од вас“, рече Арслан.
Негов бранител беше Јовица Страшевски. Адвокатот посочи дека заменува колешка, притоа се извини на жртвите и посочи дека не е во неговата етика да брани вакви предмети. Страшевски пред обвинителката, судијката, полицајците кои го спроведуваа, кажа дека Арслан е корисник на дрога.
„Не е моја етика да бранам вакви предмети, бев замолен од колешката. Како олеснителни околности судот да има во предвид дека обвинетиот е млада личност, има вереница, има план да прави свадба во мај. При одмерување на казната судот да има во предвид, дека истиот е зависник од дрога, која можеби е причинско-посредничка врска за сторување на делото. Да има во предвид дека има потреба од лекување“, рече Арслан.
Обвинителката Лидија Раичевиќ, посочи дека Арслан петпати го сторил кривичното дело.
„Обвинението содржи опис на пет кривични дела за тоа што се случило на фактични план и предлог до овој суд кои докази да се изведат. Јавниот обвинител освен што оваа содржина на поднесено обвинение денес без никакво сомнение ќе ја докаже на начин како што е предложено во писмениот отправок, доколку за тоа се укаже потреба, ќе се впушти во докажување и градење на впечаток на судот низ фазите на директно и вкрстено испрашување. Без никаков сомнеж, со највисок степен за осудителна пресуда, јавниот обвинител, ќе го застапува обвинение“, кажа обвинителката Раичевиќ.
Обвинетиот делата ги сторува во текот на повеќе години, а започнувајќи од 2021 година.
Обвинителката до манијакот: Не е доволно да се извиниш, да покажуваш полов орган – не смееш, побарај стручна помош
Обвинителката Лидија Раичевиќ која го гонеше манијакот што се задоволуваше пред девојчиња пред влезови на згради и во автобуси, на рочиштето му се обрати директно на обвинетиот Сонер Арслан, но и до жртвите и до јавноста. Раичевиќ му порача на Арслан: „Најмногу ќе му се обратам на обвинетиот за да она што ќе го кажам го изнесе како тежина од оваа судница и го запамети за цел живот“.
„Сведочиме за измени во Кривичниот законик кои се радикални, кои што бараат од нас како носители на овие функции еден сосема поинаков пристап. Пристап кој што ќе ги натера луѓето да се однесуваат во склад со моралот и сфаќањата за половна слобода. Но јас ве прашувам како? Каде е изградена таа и дали она што Сонер денес го призна, вадењето на половиот орган на јавно место, и задоволување на половите страсти, спаѓа во групата на тешки полови повреди? Јас како обвинител сведочам секојдневно за полови дејствија врз деца, за телесни повреди при вршење на полови дејствија, за едно сурово и недолично однесување во таа сфера. И при постапувањето на овој предмет, се прашував која ми е задачата. А таа е следна: да им кажам на оштетените дека никој не смее пред нив да покажува полова манифестација и затоа се тука. Да им кажам дека ако очекувале дека ќе биде пружена заштита од страна на државата – ова е начинот на кој што го правиме за да ве заштитиме. Но не само вас. Туку преку процесот на ова судење да пуштиме порака дека секое вакво однесување ќе биде казнето“, порача Раичевиќ.
Обвинителката потоа додаде: „Но најмногу од се, во овој процес поради кој сме тука е важна личноста на Сонер“.
„Тој немаше прилика да се брани, таква е процедурата. Но јавниот обвинител го сослуша. Преку записникот, навлезе во неговата психолошка потреба да го прави тоа. Тој и пред обвинителот а гледам и пред судот се однесува во манир како со гласот, така со држење на телото и изговорените зборови дека се кае, дека е спремен некому да се извини. Ама тоа не е доволно. Сонер Арслан, на оваа територија и било каде, да покажуваш полов орган и на тој начин да задоволуваш сопствена сексуална желба не смее да се прави. И ако не ти е јасно зошто, тоа е затоа што немаш согласност од другата страна. Затоа што другиот не сака тоа да го гледа во тој момент. И ако постои дилема дали тоа е единствениот начин да се доживее сексуално задоволство, јас, одговорно тврдам дека треба да се побара стручна помош. Зошто? Зошто во ера кога зборуваме за полови слободи за било какво донесување велам дека треба да се бара помош? Нели се е доволно? Да, ама границата е во согласноста. И не толку поради етиката и моралот, бидејќи и јас не сум сигурна кој ја гради етиката и моралот во половиот свет, но знам дека од било какво полово дејствие, никој не смее да биде исплашен, згрозен, посрамен. Заради признанието не ги слушнавме оштетените како се чувствувале. Ама, мојот влог е барем една сфера од животот да остане и да се гради во нешто што е добро и што им одговара на луѓето, а не патологија поради која денес се судиме. Кривично-правната заштита ќе ја пружите вие преку одлуката за казна и тоа се надевам дека ќе се одлучите за казна која кога Сонер Арслан ќе ја чуе, ќе направи се што е можно да своето однесување од овој момент го промени, дека тоа ќе биде казна која оштетените ќе ја доживеат како праведна, а се разберат и сите оние надвор кои ќе чујат дека се судело за вакво кривично дело и дека за тоа се одговара, ќе се воздржат во иднина од правење на истите. Јас сум обвинител меѓутоа ја вршам својата функција како гарант човековите права“, посочи Раичевиќ во судницата.
