Американската вселенска агенција НАСА ја започна својата мисија да испрати сателит во близина на Сонцето. Соларната сонда „Паркер“ денеска беше лансирана од центарот Кејп Канаверал на Флорида.
Оваа сонда ќе биде најбрз движечки објект произведен од човекот. Се очекува да собира податоци и да разреши голем број мистерии за Сонцето.
Сондата е именувана по астрофизичарот Јуџен Паркер, кој прв ги опиша соларните ветрови во 1958 година.
Лансирањето на сондата вчера беше откажано поради технички проблеми. „Паркер“ се очекува да се приблжи до надворешната атмосфера на Сонцето, а до таму патува со Delta-IV ракетата.
Покрај Венера сондата ќе помине за шест недели, а покрај Сонцето ќе стигне шест недели подоцна. Во наредните седум години се очекува „Паркер“ да направи 24 круга околу Сонцето за да го проучува. Сондата ќе се доближи на околу 6,16 милиони километри до Сонцето, што е најблиско досега.
,,Знам дека тоа звучи како да не е многу блиску. Но замислите дека Сонцето и Земјата се раздалечени на еден метар, тогаш сондата „Паркер“ ќе се доблжи на 4 сантиметри”, објаснува доктор Ники Фокс.
Сондата околу Сонцето ќе патува со брзини над 690 илјади километри на час.
