Во државното акционерско друштво Македонска навигација (М-НАВ), кое е во фокусот на јавноста по упадот таму, а кое е препознатливо поради високите плати, но и бројните партиски вработувања, се вработени и роднини на тројца актуелни министри, како и роднини на поранешни министри и пратеници, објави КОД, кој се емитува на телевизијата Телма.
Станува збор за сестра на министерот за надворешни работи и потпретседател на владејачката ДУИ, Бујар Османи, снаа на првиот вицепремиер и министер за полтички систем и односи меѓу заедниците, Артан Груби, исто така од ДУИ, внук на министерот за земјоделство, водостопанство и шумарство, Љупчо Николовски од владејачката СДСМ, снаата и синот на поранешниот пратеник на ДУИ, Ејуп Аљими, внукот на советникот во М-НАВ, Беким Незири од ДУИ, кој е еден од осомничените за упадот таму, внукот на заменик-министерот за внатрешни работи Назим Буши.
Според КОД роднините на Николовски и Незири работат како помошници контролори, а во оперативни работи е и сестрата на Османи, додека останатите се во администрација.
Османи за КОД изјавил дека сестра му таму работи 15 години, а Николовски дека „станува збор за високостручен професионален кадар школуван во Јапонија, Кина, дипломиран на проблематиката каква што се бара на високорангиран универзитет во Словенија, со сите професионални капацитети за какви Република Северна Македонија треба да се бори да ги задржи“.
