Во Македонија нема да има ни руска ни кинеска вакцина против ковид 19. Засега Комитетот за имунизација при Министерството за здравство решил да даде приоритет на вакцината против ковид-19 која е одобрена од ЕМА и од ФДА, односно европското и американското регулаторно тело за контрола на лекови кои го следат и контролираат целокупниот процес на создавање на вакцината како и клиничките студии.
– Тоа не значи дека вакцините коишто го немаат поминато тој процес не се безбедни, меѓутоа Министерството за здравство приоритет даде токму на таа вакцина која ги заокружила сите процеси на создавање. Министерството за здравство и за многу други препарати, лекови и продукти ги бара тие сертификати од ЕМА и ФДА, па оттука многу логично беше кога проактивно настапувавме кон одредени производители на вакцини против коронавирусот, тоа да ни биде еден од приоритетите како да ги селектираме вакцините кон кои ние како држава приоѓаме, појаснуваат од Министерството за „Слободен печат“.
Со КОВАКС механизмот и со директна соработка со производителот „Фајзер“, како и со соработка со повеќе европски земји кои понудија помош, во земјава, според најавите, вакцините ќе стигнат во февруари. Избор со која вакцина ќе се вакцинираат граѓаните нема да има, бидејќи ќе добиеме само вакцини од „Фајзер“.
Имунизацијата во државата ќе се одвива според оперативен план каде се дава приоритет на различни ризични групи граѓани. Преку КОВАКС механизмот, обезбедени се 833 илјади дози на вакцини. Стигнаа и фрижидерите кои во земјава ги донираше САД, а во кои ќе се складираат вакцините кои се чуваат на минус 70 степени. Луѓето што го прележале коронавирусот, околу 75 илјади граѓани, засега нема потреба да се вакцинираат, велат здравствените власти.
Првите вакцинални дози ќе бидат за здравствените работници кои се во првите редови во борбата со коронавирусот во ковид центрите и во интернистичките одделенија, а од нив дури високи 60 проценти изразиле желба да се вакцинираат.
