Хрватскиот премиер Пленковиќ го обвини хрватскиот претседател Милановиќ дека по неговото хушкање, биле евидентирани два инциденти против бугарски државјани во Хрватска.
Според извештајот на бугарската амбасадорка во Хрватска, Генка Весилева Георгијева, во изминатите неколку дена, по изјавата на претседателот на Хрватска, Зоран Милановиќ на самитот во Брдо кај Крањ, во Загреб се случиле три инциденти со бугарски државјани.
Пријавите биле доставени до Министерството за надворешни работи, а од Владата пријавите биле доставени до полицијата.
Полицијата ги истражува двата случаи, а третиот е решен со интервенција на бугарската амбасада, дознава хрватскиот весник Јутарњи лист.
Според првата пријава мета била постара дама, бугарска државјанка, која била нападната од таксист. Во пријавата се наведува дека таа откако влегла во такси, возачот многу остро реагирал дека премногу силно ја затворила вратата од автомобилот. Потоа ја прашал од каде е и кога го слушнал одговорот дека е од Бугарија, агресивно ѝ одговорил: „Вие, Бугарите со валканата политика кон Македонија, доаѓате да живеете тука во нашата ‘Прекрасна Хрватска’“.
Во пријавата се наведува дека таксистот го запрел автомобилот, ја замолил дамата да плати за возењето и да го напушти возилото. Дамата излегла и го замолила возачот да ѝ помогне да ја извади својата торба од багажникот, на што тој грубо ѝ ја фрлил торбата, па дамата поради тоа наводно паднала на подот.
Во вториот случај исто така станува збор за бугарска државјанка која пријавила дека предмети биле фрлени кон нејзиниот сопруг на пазарот. На ова претходела расправа за потеклото на робата што се продава, за потоа расправта да продолжи за потеклото на учесниците во расправата. Продавачот почнал да го навредува бугарскиот државјанин бидејќи, како што се вели во пријавата, „Бугарија ја уценува несреќната Македонија“, а потоа кон него бил фрлен предмет.
Во третиот случај на синот на бугарска државјанка наводно му бил забранет пристап до градинка во Загреб. Но, по сомневањата за дискриминација на детето и интервенција на амбасадата, случајот бил решен.
Во средата, случаите ги спомена и хрватскиот премиерот Андреј Пленковиќ. Тој ја коментираше реториката во вториот дел од кампањата, а потоа го спомна и претседателот Милановиќ.
„По неговите изјави за Бугарија, во Хрватска имало два инциденти против бугарски државјани. Мислам на Милановиќ“, изјави Пленковиќ.
Милановиќ му одговори вчера од Солун, каде се одржуваше воена вежба
„Премиерот оди наоколу и зборува за нападот врз Бугарите. За каков инцидент зборува Пленковиќ? Тоа е сериозно обвинување. Реков дека е комичар. Поради што сум хушкач, со предупредувањето дека политиката на една држава кон друга држава е некоректна, и дека тоа е изживување со послабите“, одоговори Милановиќ.
Милановиќ на самитот на процесот Брдо-Бриони ја критикуваше Бугарија со многу остри зборови велејќи дека Софија го условува влегувањето на Македонија во ЕУ со „измена на историските учебници“.
Според него, „таа држава и тој народ досега платија прилично висока цена“.
„Тие играат многу примерно и според правилата. Тие ги исполнија сите демократски услови што може да се замислат, тоа е мултинационална заедница во која има многу Албанци и таа соработка е примерна“, додаде Милановиќ.
Тој исто така потсети дека Македонија, меѓу другото, „се покори на грчките барања да се стави Северна пред името Македонија“.
„Конечно ги примија во друштвото на мртви поети и сега оваа состојба која навистина влегува во интимен простор“, рече претседателот, тврдејќи дека земјата е „жртва на недостаток на интерес и, ако сакате, на елементарна емпатија“.
„Ова не се прави во 21. век. Апсолутно не е основа за утрешниот соживот во Европската унија“, рече Милановиќ.
