Потрагата по жената која ФБИ ја нарече „розовиот бандит“ конечно заврши откако 35-годишната Сирс Баез била уапсена во американската сојузна држава Северна Каролина.
Баез е обвинета дека од 20-ти јули ограбила четири банки долж американскиот источен брег. Прекарот од федералните власти Баез го добила поради нејзината розова чанта која што ја носела со себе при најмалку два грабежи. Таа исто така носела големи очила за сонце, тренерка и качкет.
Првиот грабеж се случил на 20-ти јули во Карлајн во Пенсилванија, откако неколку минути пред пладне во банката „Орстаун“ упаднала Баез и од службеникот побарала да му ги предаде парите.
„Последен пат била забележана како бега од банката пешки“, соопштија од полицијата во Карлајн.
Три дена подоцна таа ограбила уште една банка во Рехебот Бич во Делавер, а кон крајот на минатата седмица „розовиот бандит“ ограби уште две банки во Северна Каролина. Првата била во Ејден во четвртокот, по што Баез отпатувала 300 километри југозападно до Хамлет каде што во саботата ја ограбила последната банка.
ФБИ покрај Баез го уапсиле и нејзиниот соучесник, 38-годишниот Алексис Моралес. Тие биле уапсени во хотел во Шарлот во неделата и при апсењето не пружиле никаков отпор. Од канцеларијата на ФБИ во Шарлот соопштија дека „доказите собрани за време на истрагата ги одвеле агентите и полицајците до идентификација на Сирс Баез како жена која ограбила најмалку четири банки“.
„Розовата дама го промени својот имиџ во портокалово одело“, објави шерифот од областа Пит на Фејсбук, алудирајќи на нејзиното апсење и тоа што ќе мора да носи портокалова затворска униформа.
Тој ги пофали и локалните и федералните службеници за брзото апсење. Баез и Моралес сега се наоѓаат во притвор во Гринвил во областа Пит, а кауцијата е одредена на четири милиони долари за секој од нив.
Засега не е познато со какво оружје биле вооружени, ниту пак колку пари успеале да украдат од четирите банки. За време на потрагата, од ФБИ понудиле награда од 10 илјади долари за информација за осомничената.
