Актуелниот премиер на земјава и лидер на СДСМ, Зоран Заев, вели дека не верува во приказните дека Бранко Црвенковски ќе формира партија.
Заев зборуваше на оваа тема откако вчера во јавноста се појави информација дека поранешниот лидер на Социјалдемократскиот Сојуз би можел да формира нова партија за локалните избори во октомври.
“Црвенковски не може да биде друго освен СДСМ. Не верувам во вакви приказни дека Црвенковски ќе формира партија, но сепак, треба него да го прашате. Црвенковски беше претседател на партијата, премиер, претседател на држава, тој е општественик. Верувам дека шпекулациите се присутни оти во Охрид најавија независна листа за локалните избори. СДСМ покажа сериозно единство и во време на опозиција и во власт и така ќе продолжиме”, изјави Заев.
Тој додаде на локалните избори СДСМ ќе настапат единствени и сплотени, и ќе ги понудат најквалитетните кандидати.
“Внимателно ги слушаме граѓаните, правиме анкети и сметам дека ќе понудиме квалитетни кандидати за градоначалници и советници”, рече Заев.
Актуелниот претседател на СДСМ денеска заедно со министерот за внатрешни работи Оливер Спасовски и градоначалникот на Општина Ресен, Живко Гошаревски, изврши увид на реновираниот објект на полициската станица во Ресен.
Шпекулациите велат дека Бранко Црвенковски ќе формира партија заедно со незадоволните од СДСМ. Гласините станаа погласни откако веќе се појавија независни листи во неколку општини, а истовремено Радмила Шекеринска по осум години се повлече од функцијата како потпретседател на владеачката партија.
Потсетуваме, Бранко Црвенковски 20 години беше лидер на Социјалдемократскиот Сојуз.
